سەردێر

دەستەی گەشتوگوزار: لەگەڵ قەدەغەی هاتوچۆ لەسەر گەشتیار نین

خەڵك-

وتەبێژی دەستەی گەشتوگوزاری هەرێم ڕایدەگەیەنێت، وەكو نەریتە لە جەژنەكان، گەشتیاران ڕوو لە هەرێمی كوردستان دەكەن و ژمارەی ئەو گەشتیارانەشی لەم جەژنە هاتوون بۆ هەرێمی كوردستان بەپێی زانیارییەكانی ئێمە زیاتر لە 250 هەزار گەشتیار هاتوونەتە هەرێمی كوردستان.

نادر ڕۆستی وتەبێژی دەستەی گەشتوگوزاری هەرێم بە دەنگی ئەمریكای ڕاگەیاند، لە جەژنی ڕەمەزان ڕێكارەكان توندبوون، ڕێگە نەدرا هەموو بازگەكان بكرێنەوە و هەموو گەشتیارێك بێتە هەرێم، بەڵام دوای جەژنی ڕەمەزان كە ژمارەی تووشبووانی كۆرۆنا كەم بووەوە تاگەیشتە ئەو ئەندازەیەی كە بەرەو لێژی و بەرەو نەمان دەڕۆیشت، بۆیە وەزارەتی تەندروستی و ناوخۆ و لیژنەی باڵای بەرەنگاربوونەوەی كۆرۆنا بڕیاریاندا ڕێگە بدەن كە هاتوچۆ ئاسایی بێتەوە و شوێنەكان ئاسایی بكرێنەوە، ئەمە وایلێهات هەتا پێش جەژن ئەم بابەتە بەردەوام بوو، بەڵام پێش جەژن ئامارەكان واینیشاندەدا كە جارێكی دیكە ڤایرۆسەكە ڕوو لەهەڵكشانە، بۆیە ئەم بڕیارەی پێش جەژن تائێستا وەكو خۆی مایەوە ئێستاش كە بڕیاری دیكە بدرێت لەلایەن لیژنەی باڵای بەرەنگاربوونەوەی كۆرۆنا بەهەماهەنگی لەگەڵ وەزارەتی تەندروستی ئەوكاتانە بڕیار دەدرێت كە مەترسیەكە زۆر گەورە بێت لەسەر هەرێم.

سەبارەت بە قەدەغەكردنی هاتوچۆی گەشتیاران، ناوبراو ڕایگەیاند، ئەوانەی لەسەر كەرتی گەشتیاری دەژین ژمارەیان كەم نییە، هەتا ئێمە بچین هەموو شوێنەكان دابخەین و بژێویان نەمێنێت، لە 2020 شەش مانگ ئێمە ئەو كارەمان كرد خەریك بوو كەرتی گەشتیاری نزیك دەبویەوە لە هەرەسهێنان، كە كەرتێكی ئابووری هەرەسی هێنا بەهۆی ڕێكارێك ڕەنگە ئەنجامێكی واشی بەدەستنەهێنابێت بەلای ئێمەوە پەسەند نییە وەكو دەستەی گەشتوگوزار، بەڵام ئەوەمان لاپەسەندە كە ڕێنمایی توند بكرێت بۆ نموونە پشكنین بكرێت بۆ ئەوانەی دێنە ناو هەرێم یان پشكنینیان پێبێت.

جەختی لەوەش كردەوە، هاتنی گەشتیاران لە ڕۆژانی جەژنی قوربان بۆ هەرێم سوودی هەبووە لەڕووی ئابوریەوە، ئەگەر هەر گەشتیارێك بەتێكڕا سێ شەو بمێنێتەوە زیاتر لە 300 دۆلار دەهێنێتە بازاڕەكانی هەرێم.

ڕوونیشیكردەوە، هیچ كاتێك لەگەڵ ئەوەدا نین قەدەغەی هاتوچۆ لەسەر گەشتیار هەبێت، چونكە ئەو بڵاوبوونەوانەی ڕوودەدەن بەهۆی ڤایرۆسی كۆرۆنا زیاتر هۆكارەكەی تێكەڵابوونە كۆمەڵایەتیەكانن، چونكە گەشتیار دەچێتە دوكانێك ناچێت دەستی لەمل بكات و تۆقەی لەگەڵ بكات و لێی نزیك بێتەوە، بەڵكو تەنها مامەڵەكەی دەكات و دەڕوات.