سەردێر

نادر ڕۆستی: كار ئاسانی بۆ گەشتیاران كراوە

تیمە تەندروستییەكان مامەڵە لەگەڵ ڕێكارەكان دەكەن

خەڵك-ئارام سەردار
وتەبێژی دەستەی گەشتوگوزاری هەرێم ڕایگەیاند، ئامادەكاری تەواو بۆ هاتنی گەشتیاران كراوەو لە لایەن حكومەتیشەوە كارئاسانییان بۆ كراوە، دەشڵێت تیمە تەندروستییەكان مامەڵە لەگەڵ ڕێكارە تەندروستییەكان دەكەن.

نادر ڕۆستی، وتەبێژی دەستەی گەشتوگوزاری هەرێم بە(خەڵك)ی ڕاگەیاند، لەسەرجام شارەكان ئامادەكاری باش كراوە بۆ پێشوازی لەگەشتیارن و كارئاسانیشیان لەلایەن حكومەت بۆكراوە، تاوەكو گەشتیاران بتوانن سەردانی ناوچە گەشتیاریەكان بكەن.

لەبارەی ڕەوشی تەندروستی دەڵێت، تیمە تەندروستیەكان مامەڵە لەگەڵ ڕێكارە تەندروستیەكان دەكەن، بۆ هەر ڕێنماییەك دەربچێت، ئەوەی لەسەر ئێمەیە هوتێل و ڕێستێورانتەكان ئامادەن بۆ پێشوازی لەگەشتیاران، لەكاتی هاتنی گەشتیارانیش سەنتەری زانیاری لەزۆربەی شارەكان هەیە و بڕووشەری تایبەت بەڕێنمایی هەیە بۆ شوێنە گەشتیاریەكان پێیان دەدرێت كەژمارە تەلەفۆنی لەسەرە، بۆ ئەوەی لە هەر حاڵەتێكدا پەیوەندی بكەن.

ئەوەشی خستەڕوو، بەهۆی ئەوەی زۆربەی گەشتیاران لەڕێگەی كۆمپانیاكانەوە دێن، بۆیە لەڕێگەی ئەوانیشەوە هەر شتێك هەبێت دەیگەیەنن.

بەپێی ئامارەكانی گەشتوگوزاری هەولێر لە‌ ماوەی ٥ رۆژی رابردوودا تاوەكو یەكەم ڕۆژی جەژن ٧٥هەزار و ٥٦٩ گەشتیار سەردانی هەولێریان كردووە تەنھا لە بازگەكان كە گەشتیاری ناوەراست وخوارووی عیراقن و پێشبینیش دەكەین لە رۆژانی جەژن ئەو رێژەیە زۆر بەرزببێتەوە. لە پارێزگای ھەولێر 40 هەزار تەختی نووستن ھەیە و زیاتر لە 3 هەزار كەپری گەشتیاری لە سنووری شارۆچكە و شارەدێیەكانی پارێزگای هەولێر ھەیە.