سەردێر

وڵاتێك، 15 تەن گۆشتی قوربانی لە هەولێر دابەش كرد

خەڵك-

ڕاوێژكاری كونسوڵگەری گشتی كوەیت لە هەولێر ڕایدەگەیەنێت، بەبۆنەی جەژنی قوربانەوە، وڵاتەكەی گەورەترین پڕۆژەی قوربانی لەهەرێمی كوردستانی عێراق دەستپێكرد.

عەلی حەمادە ڕاوێژكاری كونسوڵگەری گشتی كوەیت لە هەولێر لە لێدوانێكی ڕۆژنامەوانیدا ڕایگەیاند، پڕۆژەكەیان نەریتێكی ساڵانەیە و لە ڕێگەی پڕۆژەی دابەشكردنی گۆشتی قوربانیەوە كە لەلایەن ئەمینداریەتی گشتی ئەوقاف لە كوەیت پێشكەشكراوە.

وتیشی”70 سەر ئاژەڵیان كردووەتە قوربانی و كۆی گشتی گۆشتەكانیشیان 15 تەن گۆشت بووە و سەرجەمیشی بەسەر 7.000 خێزان دابەشكراوە”.

ئاشكراشیكرد، بەگشتی سوودی ئەو پرۆژەیە گەیەندراوە بە 35.000 ئاوارە.

ڕِوونیشیكردەوە، كوەیت گرنگی بەزیندوكردنەوەی نەریتی ساڵانی هاوكارییە مرۆییە جۆراوجۆرەكانی دەدات كە پەیوەستە بە كاری خێرخوازان و پێشكەش بە گەلی عێراقی دەكات.