سەردێر

نزیكەی 76 هەزار گەشتیار هاتوونەتە هەولێر

خەڵك-
لە‌ ماوەی ٥ رۆژی ڕابردوودا ٧٥ هەزار و ٥٦٩ گەشتیار سەردانی هەولێریان كردووە تەنھا لە بازگەكان، كە گەشتیاری ناوەڕاست و خوارووی عیراقن و پێشبینیش دەكەین لە ڕۆژانی جەژن ئەو ڕێژەیە زۆر بەرزببێتەوە.

بەڕێوەبەرایەتی گشتی گەشتوگوزاری هەولێر لە ڕاگەیەنراوێكدا ئاماژەی بەوەكردووە، لەگشت بەڕێوەبەرایەتییەكانی گەشتوگوزار لە قەزا و ناحییەكان لە سنووری پارێزگای هەولێر چەند لیژنەیەكی تایبەتیان پێكهێناوە بە مەبەستی چاودێری كردن و بەدواداچوون بۆ بنكە و ناوچە گەشتیارییەكان بۆ دڵنیابوون لە كردنەوە و پێشكەشكردنی خزمەتگوزاری بە ڕووی گەشتیاران لە رۆژانی جەژنی قوربان.

ئاشكراشی كردووە، لیژنەیەكی تایبەتیش لەبازگەكان هەیە بۆ پێشوازی و پێشكەش كردنی خزمەتگوزاری بەگەشتیاران.

ڕوونیشی كردۆتەوە، بە هەماهەنگەی لەگەڵ بەڕێوەبەرایەتییەكانی گەشتوگوزار لە قەزا و ناحییەكان ئامادەكاری بۆ پێشوازیكردنی گەشتیاران كراوە و ڕەوچاوی بەرزبوونەوەی ژمارەی گەشتیارنیش كراوە، لەبەرئەوەی لە پارێزگای ھەولێر 40 هەزار تەختی نووستن ھەیە و زیاتر لە 3 هەزار كەپری گەشتیاری لە سنووری قەزا و ناحییەكانی پارێزگای هەولێر ھەیە.