سەردێر

گەشتیارێكی زۆر ڕوویان لە سلێمانی كردووە

سلێمانی ـ نزار جەزا

بەهۆی هاتنی جەژنی قوربانەوە، گەشتیارێكی زۆر ڕوویان لەسلێمانی كردووە و بەڕێوەبەرایەتی گەشتوگوزاری سلێمانیش چاودێری نرخەكان دەكەن.

داسیار محەمەد بەڕێوەبەری ڕاگەیاندن و بەبازاڕكردن لە بەڕێوەبەرایەتی گەشتوگوزاری سلێمانی بە(خەڵك)ی ڕاگەیاند، گەشتیارێكی زۆر ڕوویان لەسلێمانی كردووە بەتایبەت لەناوەڕاست و باشووری عێراقەوە بەشێوەی گروپ هاتوون.

ئەوەشی باسكرد، تاكو ئێستا ئامارێكی دروستیان لەبەردەست نییە و لەهەوڵی كۆكردنەوەی ئاماردان، بەڵام ئێستا شوێنە گەشتیارییەكان خەریكە پڕئەبن لەگەشتیار.

زیاتر ڕوونیكردەوە، هاتنی ئەم ڕێژە زۆرە لەگەشتیار، جێگەی دڵخۆشییە، چونكە داهاتی كەرتی گەشتیاری ڕاستەوخۆی دەچێتە نێو بازاڕەوە و هاووڵاتییان مامەڵە بەو داهاتەوە دەكەن.

ئاماژەی بەئەوەشدا، گەشتوگوزاری سلێمانی ئامادەكاری تەواویان كردووە بۆ پێشوازی لەگەشتیاران.

ناوبراو لەبارەی چاودێریكردنی نرخەكان باسی لەئەوەكرد، ئاسایی لەكاتی بەرزبوونەوەی خواست كەمێك نرخ بەرزدەبێتەوە، بەڵام لەلایەن لیژنەكانیانەوە چاودێرییەكی ورد دەكەن، ئەگەر هەستكرا گرانفرۆشی دەكرێت، ئەوا بێگومان لێپرسینەوەی یاسایی دەكەن و داواشی لە هاووڵاتییان و گەشتیاران دەكەین، ئەگەر هەستیان بەگرانفرۆشی كرد، پەیوەندییان پێوەبكەن.

ساڵانە لەكاتی بۆنە جیاوازەكاندا گەشتیاران ڕوو لە شارەكانی هەرێمی كوردستان دەكەن، ئەویش بەهۆی فێنكی كەشوهەوای ناوچەكەو و بوونی سەوزایی و دیمەنی سەرنجڕاكێش.