سەردێر

كاندیدی سەدر بۆ جێگرەوەی كازمی ئاشكراكرا

خەڵك-
بڕیارە لە مانگی 10ی ئەمساڵ هەڵبژاردنی پێشوەختە بۆ پەڕلەمانی عێراق ئەنجام بدرێت و لێوەی حكومەتی نوێ‌ پێكبهێنرێت، میدیا عێراقییەكانیش كاندیدی جێگرەوەی كازمی، كە كەسایەتییەكی نزیك لە موقتەدا سەدرە و ئێستا باڵیۆزی عێراقە لە لەندەن ئاشكرادەكەن.

جەعفەر سەدر، باڵیۆزی عێراق لە لەندەن و كەسایەتی نزیك لە موقتەدا سەدر ئەو كەسایەتییە بەهێزەی ڕەوتی سەدرە، كە لە ئێستادا لە میدیا عێراقییەكان باس لە كاندید بوونی دەكرێت بۆ سەرۆك وەزیرانی داهاتووی عێراق.

بەپێی هەواڵێكی ماڵپەڕی (شەفەق نیوز) فایەق شێخ عەلی، پەرلەمانتاری عێراقی لە تویتەر ئاشكرای كردووە، “حكومەتی داهاتووی عێراق بۆ ڕەوتی سەدر بێت و جەعفەر سەدریش سەرۆكی حكومەتەكە دەبێت”.

لای خۆشیەوە، محەمەد رشك، سەركردە لە ڕەوتی سەدر هەرچەندە ئەو دەنگۆیانەی ڕەت نەكردۆتەوە بەڵام وتویەتی، “هێشتا زووە باس لە كاندیدەكانی ڕەوتی سەدر بكرێت”
وتوشیەتی، “بەگوێرەی زانیارییەكانی من و ناسینی من بۆ جەعفەر سەدر، ئەو پیاوە كە زۆر مەینەتی بەدەست سەدامەوە بینیوە، ئەگەر ڕاسپێردرا و ڕاسپاردنەكەیش ڕەوا بوو ئەوا لاری لە بابەتەكە نابێت، بەڵام ئەگەر سەرپشك بكرێت ئەوا ڕەتی دەكاتەوە”.

جەعفەر سەدر لە ساڵی 1970 لە نەجەف لەدایكبووە، كوڕی محەمەد باقر سەدر-ی دامەزرێنەری حزبی دەعوەی ئیسلامییە، كە یەكێكە لە كۆنترین حزبی ئیسلامی شیعە لە عێراق و كوڕە ئامۆزای موقتەدا سەدرە و خوشكەكەشی هاوسەری سەدرە.