سەردێر

چەكدارێكی مەترسیداری داعش دەستگیركرا

دەستی لە كوشتنی چەندان سەرباز و هاووڵاتیدا هەبووە

خەڵك-
شانەی میدیای ئەمنی، دەستگیركردنی “تیرۆ‌وریستێكی مەترسیدار” ی داعش ڕادەگەیەنێت كە دەستی لە كوشتنی چەندان سەربازی سوپای عیراق و هاووڵاتیاندا هەبووە لە پارێزگای ئەنبار.

بەپێی بەیاننامەیەك كە لەلایەن شانەی میدیای ئەمنییەوە بڵاوكرایەوە”بەپێی ئەو زانیارییە هەواڵگرییە وردانەی لەلایەن بەڕێوەبەرایەتی هەواڵگری سەربازی سەر بە وەزارەتی بەرگرییەوە دەستەبەركران، تەئكید لەسەر بوونی ژمارەیەك لە چەكدارانی ڕێكخراوی داعش كرایەوە لە گوندی ئەلعشی سەر بە قەزای رومانە لە ئەنبار، یەكێك لەو چەكدارانەش دەستی لە كوشتنی ژمارەیەك لە سەربازانی سوپای عیراق و هاووڵاتیاندا هەبووە”.

هەر لە بەیاننامەكەدا هاتووە”مەفرەزەكانی بەشی هەواڵگری سەربازی بە هاوبەشی مەفرزەكانی دەزگاى دژە تیرۆر لە ئەنبار، لەدوای وەرگرتنی زانیارییەكان بەرەو ئامانجەكە بەڕێكەوتن و توانییان لە گوندی ئەلعش تیرۆریستە مەترسیدارەكە دەستگیربكەن”.

شانەی میدیای ئەمنی دەڵێت”تیرۆریستەكە كە لەلایەن دادوەرییەوە بەپێی ماددەی 4ی تیرۆر داواكراوە، لەكاتی دەستگیركردنیدا تفەنگێكی كڵاشینكۆف و دەمانچەیەكی پێبووە و دواتر ڕادەستی لایەنە پەیوەندیدارەكان كراوە”.