سەردێر

ئەمڕۆ پەڕلەمانی كوردستان كۆدەبێتەوە

 

خەڵك-

پەڕلەمانی كوردستان كۆدەبێتەوە و خوێندنەوە بۆ چەند پڕۆژە و پێشنیازە یاسایەك دەكات.

دەستەی سەرۆكایەتی پەڕلەمانی كوردستان لە ڕاگەیەنراوێكدا بەرنامەی كاری دانیشتنی ژمارە (١٧)ی ئاسایی خولی بەهارەی ساڵی سێیەم لەخولی پێنجەمی هەڵبژاردنی پەڕلەمان لەكاتژمێر (١١)ی پێشنیوەڕۆی ئەمڕۆ سێ شەممە ڕێكەوتی ٢٠٢١/٧/٦ پەسەند كرد.

بەپێی بەرنامەی كاری كۆبوونەوەكە، دەنگدان لەسەر پێشنیازەیاسای (هەمواری یەكەمی یاسای ژمارە (٣)ی ساڵی ٢٠١٩، یاسای بەخاوەنكردنی ئەو زەوییانەی كە لەسنووری شارەوانییەكان زێدەڕۆییان لەسەر كراوە لەهەرێمی كوردستان-عێراق)، بەپێی حوكمی ماددەكانی (٩٠، ٩١، ٩٣، ٩٦، ٩٧) لەپەیڕەوی ناوخۆی پەڕلەمانی كوردستان، هەروەها خستنەڕووی بیرۆكەی ئەم پەڕلەمانتارانەی خوارەوە، بەپێی حوكمی خاڵی (٢)ی بڕگەی (یەكەم)ی ماددەی (٤٩) لەپەیڕەوی ناوخۆی پەرلەمانی كوردستان:

– بیرۆكەی پەڕلەمانتار (عبدالستار مەجید قادر) سەبارەت بە (دۆزینەوەی هەلی كار لەڕێگای بەگەڕخستنەوەی كارگەكان).
– بیرۆكەی پەڕلەمانتار ( عوسمان عەلی سمایل) سەبارەت بە (لەپێناو پاراستنی ژینگەی شارو شارۆچكەكانی كوردستان هەوڵێك بۆ ڕێسایكلینی خاشاك).
-بیرۆكەی پەڕلەمانتار (زێدان رەشید خان اودل) سەبارەت بە (پرسی خوێندنی باڵاو توێژینەوەی زانستی).
-بیرۆكەی پەڕلەمانتار (شایان كاكە صالح) سەبارەت بە (ڤایرۆسی نەخۆشی كۆڤیدـ ١٩).

دەستەی سەرۆكایەتی ئاشكراشیدەكات، لە كۆبوونەوەكەدا خوێندنەوەی دووەم بۆ ئەم پێشنیاز و پڕۆژەیاسایانەی خوارەوە بەپێی حوكمی ماددەكانی (٨٧، ٨٨، ٨٩) لە پەیڕەوی ناوخۆی پەڕلەمانی كوردستان دەكرێت”

-پێشنیازو پڕۆژەیاسای (هەمواری یەكەمی یاسای ماف و ئیمتیازاتی كەم ئەندام و خاوەن پێداویستی تایبەت ژمارە (٢٢)ی ساڵی ٢٠١١ لەهەرێمی كوردستان-عێراق).
– پڕۆژەیاسای (بەركاركردنی یاسای ڕەسمی پولی عێراق ژمارە (٧١)ی ساڵی ٢٠١٢ لەهەرێمی كوردستان-عێراق).
-پڕۆژەیاسای (بەركاركردن و هەمواری یاسای وەبەرهێنانی پیشەسازی هەردوو كەرتی تایبەت و تێكەڵاو ژمارە (٢٠)ی ساڵی ١٩٩٨ی هەمواركراو).