سەردێر

داوا لە حكومەتی هەرێم و سەرۆكی هەرێم دەكرێت حاجی ئاوا بكاتە قەزا

خەڵك ـ نزار جەزا
بەڕێوەبەری ناحیەی حاجی ئاوا داوا لەوەزیری ناوخۆ و ئەنجوومەنی وەزیران و سەرۆكایەتی هەرێم دەكات ڕەزامەندبن، بۆ بەقەزابوونی ناحیەی حاجی ئاوا.

ئەزوەر جەعفەر، بەڕێوەبەری ناحیەی حاجی ئاوا بە (خەڵك)ی ڕاگەیاند، سنووری دەسەڵاتی قەزا لەناحیە فراوانترە، بۆیە بەدەرچوونی بڕیاری بەقەزابوونی حاجی ئاوا دەسەڵاتە كارگێڕی و داراییەكان زیاتر دەبن و دەتوانن خزمەتی زیاتر بە ناوچەكە بكەن.

ئاماژەی بەئەوەشدا، بەپێی پەیڕەوی ژمارە یەك-ی ساڵی 2015 ی ئەنجومەنی پارێزگا، حاجی ئاوا هەموو پێوەرەكانی بەقەزابوونی تێدایە.

باسی لەئەوەشكرد، ئەمڕۆ هەنگاوی یەكەمیان بۆ بەقەزابوونی حاجی ئاوا بڕی و لەئەنجوومەنی پارێزگا یاداشتێكی بەرزكراوەتەوە، بۆیە داواكارن لەوەزارەتی ناوخۆ و ئەنجوومەنی وەزیران و سەرۆكایەتی هەرێم پشتیوانبن بۆ بڕینی هەنگاوە ئیدارییەكانی دیكە.

ئەوەشی خستەڕوو، ئەمڕۆ لەئەنجوومەنی پارێزگاوە پێشنیازكراوە، دواتر پێویستی بەڕەزامەندی وەزیری ناوخۆیە، دوای ئەوەش، پێویستی بە پەسەندكردنیەتی لەئەنجوومەنی وەزیران، لەكۆتاییشدا پێویستی بەمەرسومێكی هەرێمی هەیە.

ئەوەشی باسكرد، گەشبینین بەپەسەندكرنی پێشنیازەكەی ئەنجوومەنی پارێزگا، چونكە ناوچەكە شایەنیەتی، لەڕووی ئیداری و جوگرافی و ژمارەی دانیشتووانەوە گونجاوە، قوربانییەكی زۆر لەم ناوچەیە بۆ سەربەخۆیی كوردستان دراوە، بۆیە ئەم بڕیارە دیارییەكی زۆر باشە بۆ ناوچەكە.

وتیشی: “ئەگەر بڕیارەكە جێبەجێبكرێت، هەنگاوێكیش دەبێت بۆ بەپارێزگابوونی ئیدارەی ڕاپەڕین لەئایندەدا، چونكە دەبینە خاوەنی سێ قەزا لەناوچەكە”.

ئەوەشی باسكرد، بەپێی بڕیار و ڕێنماییەكانی حكومەتی هەرێم پۆستەكان پڕدەكرێنەوە و لەهەرشوێنێكبن خزمەتكاری هاووڵاتییان دەبن.

ئەمە لەكاتێكدایە ئەمڕۆ سێ شەممە ئەنجوومەنی پارێزگای سلێمانی بەكۆی دەنگ پێشنیازی كرد، كە بازیان و حاجی ئاوا بكرێنە قەزا.