سەردێر

گەرما دەوامی لە عێراق ڕاگرت و بۆ فەرمانبەرانی هەرێمیش بڕیار دەدرێت

خەڵك-
پلەكانی گەرما بەشێوەیەكی بەرچاو ڕووویان لە بەرزبوونەوە كردووە و هاوكات ژمارەیەكی زۆری هاووڵاتیان و بەتایبەت منداڵان تووشی نەخۆشی سكچوون و ڕشانەوە بوون، بۆ ئەوەش ژمارەیەك پارێزگای عێراق دوو ڕۆژی كۆتایی ئەم هەفتەیان كردە پشوو، سەرۆكی ئەنجوومەنی پارێزگای سلێمانی-ش دەڵێت: “چاوەڕێی كەشناسی دەكەن تا بڕیاری پێویست لەبارەیەوە دەربكەین”.

بەپێی ڕاپۆرتە كەشناسی و تەندروستییەكان، پلەكانی گەرما لە زۆربەی شار و شارۆچكەكانی هەرێم ڕووی لە بەرزبوونەوە كردووە و ئەمڕۆ هەریەكە لە پارێزگاكانی دیالە و دیوانیە و نەجەف و بەسرە و چەند پارێزگایەكی دیكەی عێراق پشووی فەرمییان ڕاگەیاند و ڕۆژانی چوار شەممە و پێنج شەممەیان كردە پشوو بۆ فەرمانبەران.

بۆ بەدواداچوون لەسەر پرسی ڕاگەیاندنی پشوو بەهۆی گەرماوە، كە ساڵانە حكومەتی هەرێم لەكاتی بەرزبوونەوەی پلەكانی گەرما بڕیاری لێ‌ دەدات (خەڵك) چەند جارێك پەیوەندی كرد بە د. جوتیار عادل، وتەبێژی فەرمی حكومەتی هەرێم و د. هەڤاڵ ئەبوبەكر، پارێزگاری سلێمانی، بەڵام وەڵامی پەیوەندییەكانیان نەدایەوە.

لای خۆشیەوە، ئازاد محەمەد، سەرۆكی ئەنجوومەنی پارێزگای سلێمانی بۆ (خەڵك) وتی، “چاوەڕێ بووین بە فەرمی ڕابگەیەنرێت پلەكانی گەرما چەندن و چی پێویستە بیكەین، كە ئەگەر پلەكانی گەرما لە ئاستی خۆیان زیاتر بەرزببنەوە و زیانی هەبێت بۆ فەرمانبەران ئەوا بڕیارێكی لەبارەوە بدەین”.

ڕاشیگەیاند، تا ئەم ساتە هیچ بڕیارێك بە فەرمی ڕانەگەیەنراوە.

هاوكات، د. ئاسۆ حەوێزی، وتەبێژی وەزارەتی تەندروستی بۆ (خەڵك) وتی، “بۆ ڕاگەیاندنی پشوو بەهۆی گەرماوە ئەوە پەیوەستە بە حكومەتی هەرێمەوە و دەبێت ئەوان بڕیاری لێ‌ بدەن، بەڵام وەكو لایەنی تەندروستی ئێمە ڕێنماییمان بۆ هاووڵاتیان ئەوەیە، كە خۆیان لە بەركەوتنی ڕاستەوخۆی تیشكی خۆر ببپارێزن بەتایبەتی منداڵان و دژەخۆر بەكاربهێنن و لەشوێنی فێنك بمێننەوە”.

ئاماژەی بەوەشكرد، هەر شتێكی نوێ‌ بێتەپێشەوە، ئێمە وەكو تەندروستی ڕاگەیەنراوی خۆمان دەبێت و ڕێنمایی بە هاووڵاتیان دەدەین.