سەردێر

فراكسیۆنی پارتی بۆ سەرۆكی پەرلەمان: با هەستی كەس بەناهەق بریندار نەكرێت

داوای پێكهێنانی لیژنە دەكات

خەڵك-
وتەبێژی فراكسیۆنی پارتی لە پەرلەمانی كوردستان لەبارەی نووسراوێكی سەرۆكی پەرلەمانی كوردستانەوە ڕوونكردنەوەیەك بڵاودەكاتەوە و داوای پێكهێنانی لیژنەی لێكۆڵینەوە دەكات و دەڵێت، با هەستی كەس بەناهەق بریندار نەكرێت.


بەپێی ڕاگەیەندرتاوێك كە لەلایەن پێشەوا هەورامانی وتەبێژی فراكسیۆنی پارتی لە پەرلەمانی كوردستان بڵاوكرایەوە”نوسراوێك بە واژۆی بەڕێز سەرۆكی پەرلەمان ئاراستەی ئەنجوومەنی وەزیران كراوە لەبارەی ئەوەی پەرلەمانتاران بۆیان نییە سەردانی پڕۆژەكانی وەبەرهێنان بكەن بەتەنها بەمەبەستی بەدواداچوون و ئەوەی لە تۆڕەكۆمەڵایەتییەكان لێكدانەوەی بۆ دەكرێت گوایە لەسەر هەڵەی چەند پەرلەمانتارێكەو پێگەی خۆیان بۆ بەرژەوەندی كەسی بەكارهێنابێت”.

هەر لە ڕاگەیەندراوەكەدا هاتووە”بە خۆشحاڵییەوە ڕایدەگەێنین كە هیچ ئەندامێكی فراكسیۆنی پارتی نین و پەرلەمانتارانی فراكسیۆنەكەمان پەروەردە و گۆشكراوی ڕێبازی بارزانین،هەموو هەڤاڵانمان لەهەموو لێژنەكان و بەتایبەت لێژنەی وەبەرهێنان،پیشەییانە كاریان كردووەو باش دەزانن باش و خراپ چییە”.

پێشەوا هەورامانی داوا لە سەرۆكی پەرلەمان دەكات”هەر ئەمڕۆ لیژنەیەكی لێكۆڵینەوە پێكبهێنێت و ئەم بابەتە دوا نەخات و هەركەسێك پلەو پێگەی خۆی بۆ بەرژەوەندی كەسی بەكار هێناوە ناوی بهێنرێت و كە ئەنجام دەستكەوت ڕێوشوێنی یاسایی لەبەرانبەرییان بگیرێتە بەرو هەستی كەس بە ناحەق بریندار نەكرێت”.