سەردێر

گەنجێك پێنج ساڵە سیستەمی پرسەی ئەلیكترۆنی ڕاگەیاندووە و كاری پێدەكرێت

 

خەڵك – یەحیا حبیب

گەنجێك لە شارۆچكەی دەربەندیخان ماوەی پێنج ساڵە پڕۆژەی بە ئەلیكترۆنیكردنی قورئان خوێندنی بۆ پرسەكان ڕاگەیاندووە، جگە لەوەی لەسەر ئەركی خۆیان گەیاندویانەتە شار و شارۆچكەكانی هەرێمی كوردستان چەند وڵاتێكی دیكەی دەرەوە داوایان كردووە و سودیان لێوەرگرتووە.

فەرمان عبدالڕحمان، گەنجێكی شارۆچكەی دەربەندیخانە كە پڕۆژەی بە ئەلیكترۆنی كردنی قورئان خوێندنی لە پرسەكان ڕاگەیاندووە، بە وتەی خۆی مامۆستایانی ئاینییش هاوكاری بوون لەم كارەدا و ئێستا زۆرینەی هەرێمی كوردستان ئەم سیستەمە بەكاردێنێت و لە لایەكی دیكەشەوە فشاری كرێی قورئان خوێندنی لە سەر خاوەن پرسە لابردووە، چونكە ئەم سیستەمە بێبەرامبەرە.

فەرمان عەبدوالڕحمان سەبارەت بە پڕۆژەی بە ئەلیكترۆنی كردنی قورئان خوێندن لە پرسەكاندا بۆ (خەڵك) دەڵێت، “ئەم پرۆژەی خوێندنی قورئانی پیرۆزە بە ڕێگەی ئەلیكترۆنی (Dj) واتە لە جێگەی ئەوەی كەسێك بهێنی و بڕە پارەیەكی زۆری پێبدەیت و قورئان لە پرسەكە بخوێنێت لە ڕێگەی ئەم پرۆژەیە بە هەمان شێوە پرسەكە بەڕێوە دەبرێت و بێ ئەوەی هیچ بڕە پارەیەكیش بدەیت و فشارێك لەسەر كەسوكاری مردووەكە دروست ببێت ”.

وتیشی، “بیرۆكەی كارەكە دەگەڕێتەوە بۆ ئەوەی خۆمان پرسەیەكمان هەبوو ئەو كات بە هۆی زۆری پرسەوە لە دەربەندیخان قورئان خوێنمان دەستنەدەكەوت، بیرم لەوە كردەوە كە جێگرەوەیەك پەیدا بكەم بۆ كار ئاسانی خاوەن پرسەكان و ئەم پرۆژەیەمان دامەزراند ”.

دەشڵێت، “لە بەرواری 22/6/2016 بۆ یەكەمجار لە پرسەیەكی دەربەندیخان بە كارمان هێنا و سوپاس بۆ خوا سەركەوتنێكی زۆر باشی بەدەستهێناو ئێستا لە دەربەندیخان هیچ قورئان خوێنێكی بە پارەی لێنەماوە و لە زۆرینەی شارەكانی هەرێمی كوردستان و دەرەوەش بەكاری دێنن ”.

فەرمان عبدالڕحمان لە دوای دامەزراندن و ڕاگەیاندنی پڕۆژەكەی كە ماوەی پێنج ساڵە بەردەوام كاری تێدا دەكرێت بەهاوكاری دوو گەنجی خۆبەخش بە ناوەكانی (ئەیوب محمد ساڵح – گەرمیان عبدالڕەحمان) لەخۆبردووانە پڕۆژەكەیان بەردەوامی پێدا تا سەركەوتن و لە زۆرینەی شار و شارۆچكەكان بەو سیستەمە ئەلیكترۆنییە پرسەكانیان بەڕێوە دەبەن.

ئاماژەی بۆ ئەوەشكرد، “بەدەنگەوە هاتنی خەڵك سەرەتا لە دەربەندیخان زۆر باشبوو جێی دڵخۆشیمان بوو هانی داین بۆ فراوانكردنی لە سەر سێ تەوەر كاری لەسەر بكەین بۆ سەرخستنی، بەجۆرێك لە ڕووی كارگێڕییەوە ئیدارەی شار زۆر هاوكار و پاڵپشتمان بوو بەسوپاسەوە ئەو كات مامۆستا ناسیح مەلا حسن، قائیمقامی پێشوی دەربەندیخان، زۆرترین هاوكاری كردین نەك تەنها لە دەربەندیخان بەڵكو بۆ جێگەكانی دیكەی كوردستانیش بەهەمان شێوەی دەربەندیخان لە ڕێگەی یەكە كارگێڕییەكانی ئەو شوێنانەوە كار ئاسانی باشی بۆ كردین لەگەیاندنی پڕۆژەكەمان پێیان ”.

No description available.

باسیلەوەشكرد، “ مامۆستایانی ئاینی دەربەندیخان بە سوپاسەوە زۆر هاوكاربوون و هانی خەڵكیاندا كە بەم سیستمە پرسەكانیان بەڕێوە ببەن و لە وتاری هەینی باسی گرنگی و سوودی ئەم پرۆژەیەیان بۆ هاووڵاتیان دەكرد و دڵخۆشبوین كە دانیشتوانی دەربەندیخان زۆر هاوكاربوون و ئامادەیی خۆیان نیشاندا كە پرسەكانیان بەم شێوەیە بەڕێوە ببەن و پاڵپشتییەكی زۆر باشیان لێكرد و دواجار پڕۆژەكەمان سەركەوت و ماوەی نزیكەی 6 ساڵە بەردەوامە ”.

وتیشی، “لە دوای سەركەوتنی پرۆژەكە، بەو پێیەی پرسە ڕەهەندێكی كۆمەڵایەتی هەیە و هاوڵاتیان بۆ پرسەكردن سەردانی ناوچە جیاوازەكان ئەكەن ئەمەش وایكرد كە ئەم پرۆژەیە لای ئەوانیش ئاشنا ببێت و لە ڕێگەی كەسانی خۆبەخشەوە بگوازرێتەوە بۆ جێگەكانی خۆیان، هەر بۆیە جگە لە شارۆچكەی دەربەندیخان پرۆژەكەمان گەیاندووەتە هەریەك لە (پارێزگای هەڵەبجە – پارێزگای سلێمانی – پارێزگای هەولێر – ئیدارەی گەرمیان – قەزای شارەزوور – قەزای پێنجوێن)، زۆر شار و ناحیە و گوندی دیكەی هەرێمی كوردستان ”.

دەشڵێت، “لەگەڵ ئەوەشدا لە سەر ئەركی خێرخوازان جیهاز (DJ) و قورئانمان بۆ بەشێكی ئەو ناوچانەش دابینكردووە، بە هەمان شێوەیە بەبێ بەرامبەر خاوەن پرسەكان سوودی لێ دەبینن و ئەمەش ئەركی خاوەن پرسە ئاسانتر دەكات چونكە بێ بەرامبەرە ”.

پڕۆژەی بە ئەلیكترۆنیكردنی قورئان خوێندنەوە لە پرسەدا سنورەكانی هەرێمی كوردستانی تێپەڕاند و ئێستاش هەریەكە لە وڵاتەكانی (سوید – بەریتانیا- فینلەندا) ئەم گەنجانە پڕۆژەكەیان لە سەر داوای ئەو هاووڵاتییە كوردانەی لەو وڵاتانەدان بۆ ئەوەی وەك كوردستان بە شێوەی ئەلیكترۆنی پرسەكانیان بەڕێوە ببەن.

فەرمان عەبدالڕحمان، لە ئێستادا سەرقاڵی ئەوەیە كە پڕۆژەی بە ئەلیكترۆنیكردنی قورئان خوێندن لە پرسەدا وەك پرۆژەیەكی گشتی و خزمەت پێشكەشی وەزارەتی ئەوقاف و كاروباری ئاینی حكومەتی هەرێمی كوردستان بكات، بۆ ئەوەی سەرجەم ناوچەكانی كوردستان سوودی لێببینن.

No description available.