سەردێر

رۆژهەڵاتی كوردستان بایكۆتی هەڵبژاردنەكانی ئێرانی كرد

هەڵمەتی بایكۆتی حیزبەكانی رۆژهەڵاتی كوردستان سەركەوت

 

خەڵك-

ئەندامێكی دەفتەری سیاسی حزبی دیموكراتی كوردستان ڕایدەگەیەنێت، دەنگدەرانی ڕۆژهەڵاتی كوردستان بەدەم بانگەوازی حزبەكانی ڕۆژهەڵاتەوە هاتوون و بەشێكی زۆریان بایكۆتی هەڵبژاردنەكانیان كردووە.

محەمەد ئیبراهیم زارعی سەرۆكی بنكەی هەڵبژاردنەكانی پارێزگای سنە ڕایگەیاند، كۆی گشتی دەنگەكان لە پارێزگای سنە 451 هەزار و 590 دەنگ بووە كە 117 هەزار و 856یان دەنگی بەتاڵ بوون.

ڕوونیشیكردەوە، شاری دیواندەرە بە 61.5% زۆرترین بەشداری و سنە بە 26.41% كەمترین ڕێژەی بەشدارییان لە هەڵبژاردنەكان بووە.

لای خۆشییەوە عومەر باڵەكی ئەندامی دەفتەری سیاسی حزبی دیموكراتی كوردستان بە (خەڵك)ی ڕاگەیاند، لە ڕۆژهەڵاتی كوردستان و لە ئێران بە گشتی ئەمجارە وەك ساڵی 1980 ڕۆژهەڵاتی كوردستان دووبارە تووڕەیی و بایكۆت و “نا”یەكیتریان بە كۆماری ئیسلامی ئێران وت.


وتیشی”ئەگەر هەڵبژاردنی شورا و شار و گوندەكان لەگەڵ هەڵبژاردنی سەرۆك كۆمار نەبوایە، سەر سندوقی دەنگدان بە تەواوی بەتاڵ دەبوو، بەڵام ئەوەی هەڵبژاردنی شورای شار و گوندەكانی لەگەڵ كەوتووە لەوانەیە كۆمەڵێك خەڵك لەبەر خزم و كەسایەتی و دراوسێیەتی ڕوویان لە سندوقەكانی دەنگدان كردبێت، ئەویش ڕێژەكەی یەكجار كەمە، بۆ نمونە لەوانەیە لە شارێكی 200 هەزار كەسی لەوانەیە 12 هەزار كەسێك بەشداری دەنگدانی كردبێت، ئەو ڕێژەیەش زۆر كەمە”.
ئاشكراشیكرد، ئەو بانگەوازەی ناوەندی هاوكاری حزبەكانی ڕۆژهەڵات و حزبی ئۆپۆزسیۆنی ئێرانی بە گشتی كردیان و ئەو بەدەنگەوە هاتنەی خەڵكی ئێران و ڕۆژهەڵات بە باشی پێشوازی لێكرا و هەمووشمان باش دەزانین ڕێژەكەی زۆر كەمە.

ڕوونیشیكردەوە، ئەوەی خۆیان دەڵێن ئیبراهیم ڕەئیسی دەنگی یەكەمی هێناوە، لە ڕاستیدا دەنگی سپی دەنگی دووەمی بەدەستهێناوە، لەگەڵ ئەوەی ڕێژەیەكی زۆر لە سەرەوە بەشداری دەنگدانیان نەكردووە.

ئەمەش لەكاتێكدایە، كۆی گشتی ئەو كەسانەی لە ناوچەكە مەرجەكانی بەشداریان لە هەڵبژاردنیان هەبووە، ملیۆنێك و 219 هەزار و 126 دەنگدەر بوون.

بە پێی زانیارییەكان، ئیبراهیم ڕەئیسی 185 هەزار و 824 دەنگ پلەی یەكەمی هێناوە و موحسین ڕەزایی بە 66 هەزار و 895 دەنگ پلەی دووەم و عەبدولناسر هیمەتی بە 66 هەزار و 240 دەنگ پلەی سێهەمی بەدەستهێنا.
بەشێك چاودێرانی سیاسی ئاماژە بۆ ئەوە دەكەن، هەڵبژاردنەكان لە وڵاتانی ڕۆژهەڵاتی ناوەڕاست، هیچ كاریگەرییەك لەسەر سیاسەتی ئەو وڵاتانە ناكات، زۆرترین گۆڕانكاریش لە هەڵبژاردنەكان تەنها گۆڕینی ڕووخساری كەسی یەكەمی ئەو وڵاتەیە ئەگەر ڕووبدات، ئەگەر نا جێبەجێكردنی پلانی دەرەكی و ناوخۆییان ستراتیژییە و گۆڕانكاری بەسەردا نایەت.
ئاشكراشیدەكەن، گەڕانەوەی مافی كورد لە ڕۆژهەڵاتی كوردستان لە سەردەمی ئیبراهیم ڕەئیسی هیچ گۆڕانكارییەكی بەسەردا نایەت، چونكە بڕیاردان لەو پرسانە ڕێبەری باڵای شۆڕش دەیدات نەك سەرۆك كۆمار، هەر لەبەر ئەوەشە دوای گۆڕینی چەندین سەرۆك كۆمار لەو وڵاتە مافی كورد هیچ گۆڕانكارییەكی بەسەردا نەهاتووە.

لای خۆشییەوە جیك سالیوان ڕاوێژكاری ئەمنی و نەتەوەیی ئەمریكا سەبارەت بە دەرچوونی ئیبراهیم ڕەئیسی وەك سەرۆك كۆماری ئێران ڕایگەیاند، بڕیاردان بۆ گەڕانەوە بۆ ڕێككەوتنی ئەتۆم لەلایەن سەرۆك كۆماری هەڵبژێردراوی ئێرانەوە نییە، بەڵكو لەلایەن عەلی خامنەیی ڕێبەری باڵای شۆڕشی ئیسلامی ئێرانەوەیە.
وتیشی”لە ئێستادا هەموو هەوڵەكانی ئێمە بۆ ڕێگریكردنە لەوەی ئێران نەبێتە خاوەنی چەكی ئەتۆم، بۆ ئەمەش ڕێگای دیبلۆماسی بە باش دەزانین نەك ڕێگای سەربازی”.
ئەمریكا بۆ گەیشتن بە ڕێككەوتن بەشێوەیەكی ناڕاستەوخۆی لەگەڵ ئێران لە گفتوگۆدایە بە هاوكاری چەند وڵاتێك، ئەمەش لەكاتێكدایە لە ساڵی 2018 ئەمریكا لەو ڕێككەوتنە كشایەوە و ساڵێك دوای ئەو وادەیەش ئێران لەو ڕێكەوتنە كشایەوە و كاركردنی خۆی لە بواری ئەتۆمی وڵاتەكەی درێژە پێدا.