سەردێر

شەش هەفتەی ئایندە بۆ زیندووكردنەوەی ڕێككەوتنی ناوەكیی یەكلاكەرەوەیە

خەڵك

ڕۆژنامەی نیویۆرك تایمزی ئەمریكایی بڵاویكردەوە ئاماژەكان لەنێو گفتووگۆكانی ناوەكی ئێران بۆ ئەوە دەچن بڕیاری كۆتایی لە ماوەی 6 هەفتەی ئایندەدا دەدرێت.

بەپێی ڕاپۆرتی ئەم رۆژنامەیە، بڕیاری كۆتایی بۆ زیندووكردنەوەی ڕێككەوتنی ناوەكیی نێوان ئێران و 6 دەوڵەتی زلهێز كە لە 2015 واژكراوە، لە پێش دەستبەكاربوونی ئیبراهیم ڕەئیسی سەرۆكی هەڵبژێردراوی ئێران دەبێت، بەتایبەت كە تا ئەم كاتە حكومەتێكی میانەڕەو فەرمانڕەوایە لە ئێران.

گەورە یاریدەدەری جۆ بایدن سەرۆكی ئەمریكا ڕایگەیاند، لە پشتی دەرگا داخراوەكانەوە لە ڤیەنا گفتووگۆ دەكەن لەسەر بەرنامەی ناوەكیی لە مانگی نیسانەوە، بۆیە ڕەنگە بگاتە زیندووكردنەوەی ڕێككەوتنە كۆنەكە.

شرۆڤەكاران دەڵێن 6 هەفتەی ئایندە یەكلاكەرەوەیە بۆ زیندووكردنەوەی ڕێككەوتنەكە پێش دەستەبەكاربوونی سەرۆكی نوێ.

بەرپرسان لە واشنتن و تاران دەڵێن ڕێبەری شۆڕشی ئیسلامیی ئێران عەلی خامنەئیی خوازیاریی دووبارە زیندووكردنەوەی ڕێككەوتنی ناوەكییە لەگەڵ خۆرئاوا، ڕێككەوتنێك كە دۆناڵد ترەمپ سەرۆكی پێشووی ئەمریكا لە 2018 لێی كشایەوە و سەرلەنوێ سزاكانی سەپاندەوە بەسەر ئێراندا.