سەردێر

هێندێك لە عەرەبەكان دژی ناردنی 200 ملیارەكەن بۆ هەرێم

ئەندامێكی پەرلەمان: ناڕەزایەتی عەرەبەكان زیاتر بانگەشەی هەڵبژاردنە

خەڵك-

ئەندامێكی لیژنەی دارایی پەڕلەمانی عێراق ڕایدەگەیەنێت، هەندێك لە پەڕلەمانتارە عەرەبەكان ناڕازین لە ناردنی بەشە بودجەی هەرێم.

هەفتەی ڕابردوو هەرێم و بەغدا ڕێككەوتن لەسەر ناردنی 200 ملیار دینار بۆ هەرێم، تاكو ئەوكاتەی ووربینی داهاتەكانی هەرێم كۆتایی پێدێت.

شیروان میرزا ئەندامی لیژنەی دارایی لە پەڕلەمانی عێراق بە(خەڵك)ی ڕاگەیاند، هەندێك لە پەڕلەمانتارە عەرەبەكان گلەییان هەیە لەسەر ئەو ڕێككەوتنە، بەڵام زیاتر لە بانگەشەی هەڵبژاردن دەچێت.
وتیشی”بابەتەكە شتێكی نایاسایی نییە، بەڵام ناڕەزایەتی هەر دەبێت و لە سەردەمی عادل عەبدولمەهدیش ناڕەزایەتی هەبوو كۆمەڵێك خەڵك هەر دەبێت قسە بكەن”.

ئاشكراشیكرد، ئەوەی دیاری كراوە وەكو سولفە دەدرێت بە هەرێم، تاكو كاروباری لیژنەكان و ووردبینی لە داهاتەكان تەواو دەبێت، بەشێوەیەك دیوانی چاودێری دارایی فیدراڵی لە كوردستان بوون و ووردبینیان لە نەخۆشخانەكان و خاڵە سنوورییەكان كردووە و هاوكات وەزارەتی نەوتیش ڕاپۆرتی خۆی بەرز دەكاتەوە بۆ ئەنجومەنی وەزیران، ئەوەی ئێستا بڕیارە بدرێت وەكو سولفەیەك وایە، تاكو ئەو ڕێوشوێنانە تەواو بكرێت، دواتر حسابات دەكرێت ئەگەر لەوەی بۆ هەرێم نێردراوە زیاتری بەردەكەوێت یان كەمتر.
سەبارت بە ناردنی ئەو بڕە بودجەیەی دیاری كراوە بۆ مانگەكانی ڕابردوو، ناوبراو وتی: یاسای بودجە ساڵانەیە و لە 31-12 كۆتایی دێت، واتە دەبێت لە مانگی یەكی ئەمساڵەوە یاساكە جێبەجێ بكرێت.