سەردێر

سەربڕەكەی داعش لە پردێ‌ دەستگیركرا

پێشمەرگە هاوكار بووە

خەڵك-
بەڕێوەبەرایەتی هەواڵگری و ئاسایشی كەركوكی سەر بە حكومەتی فیدراڵ، دەستگیركردنی دوو ئەندامی دەركەوتووی ڕێكخراوی داعش ڕادەگەیەنێت، ئاماژە بە هەماهەنگی و هاوكاریی پێشمەرگەش دەكات لە پرۆسەی دەستگیركرنەكەدا.

بەپێی بەیاننامەیەك كە لەلایەن بەڕێوەبەرایەتییەكەوە بڵاوكرایەوە”بەپشتبەستن بە زانیاریی هەواڵگری ورد و لە ئۆپەراسیۆنێكی جۆری، پیاوانی بەڕێوەبەرایەتی هەواڵگری و ئاسایشی مەیدانی كەركوكی سەر بە بەڕێوەبەرایەتی گشتی هەواڵگری و ئاسایش، توانیان دوو تیرۆریستی سەر بە گروپە تیرۆریستییەكانی داعش لە گوندی قەرە سالمی سەر بە ناحیەی پردێ‌ دەستگیربكەن “.

بەڕێوەبەرایەتی هەواڵگری كەركوك دەڵێت”تیرۆریستی یەكەم ناسراوە بە (ئەبو ئەنەس) كە كەسێكی نزیكە لە سەركردە تیرۆریستەكانی داعش و بەشداریی لە چەندان پەلاماری سەر هێزە ئەمنییەكاندا كردووە، وێڕای ئەو هێرشانەی كە هاووڵاتیانی بێتاوان كراونەتە ئامانج، لە ڕفاندن و دانانی بازگە و نانەوەی بۆسە، تیرۆریستی دووەمیش ناسراوە بە (ئەبو زوبێر) كاریی سەربڕ بووە لەنێو گروپە تیرۆریستییەكان و بەشداریی لە چەندان هێرش و پەلاماری تیرۆریستیدا كردووە و چەندان كارمەندی هێزە ئەمنییەكانی بەدەستی خۆی كوشتووە”.

بەڕێوەبەرایەتییەكە ڕایگەیاندووە كە ئۆپەراسیۆنەكە بە هەماهەنگی و بەشداریی هێزێكی سەر بە فەرماندەیی پۆلیسی كەركوك و هێزێكی تری سەر بە پێشمەرگە بووە.