سەردێر

ڕاهێنەرێك: لەبەر ئەم هۆكارانە عیراق لە ئێران دەباتەوە

خەڵك-
باسم قاسم، ڕاهێنەری پێشووی هەڵبژاردەی عیراق پێشبینی دەكات، هەڵبژاردەی عیراق بە ئاستێكی باشەوە دەربكەوێت و لە ياریی سبەینێی پاڵاوتنەكانی جامی جیهانی كە ئێستا لە مەنامە بەڕێوەدەچێت براوەبێت، چونكە بە وتەی ئەو، هەڵبژاردەی عیراق لە یارییە قورس و بەهێزەكاندا دەركەوێت و زیاتر هەولدەدات، تا ئەنجامێكی ئەرێنی بهێنێتەدی.

ئەمڕۆ دوو شەممە، باسم قاسم لە لێدوانێكی ڕۆژنامەوانیدا ڕایگەیاند”هەڵبژاردەی عیراق بە پێچەوانەی ئێرانەوە، زیاتر دڵنیایە لە ڕەوشی ئێستا و ڕیزبەندی یەكەمی گروپەكەی و متمانەی تەواوی بە یاریزانانی هەیە كە دەتوانن بەشێوەیەكی باش یاریی بكەن و بە شێوازێكی ڕاست و گونجاوەوە لە یارییەكەدا خۆیان بنوێنن”.

باسم قاسم پێیوایە”چارەسەرەكان لەكاتی بەڕێوەچوونی یارییەكە و لە هەردوو گێمەكەكەدا لەبەردەستن و كاریگەریی ڕوونيان بۆ هێنانەدی ئەنجامێكی ئەرێنی دەبێت”.

ئەو ڕاهێنەرە عیراقیە دەڵێت”ئەوەی گرنگ بوو لە دوو یاریی پێشتر، بەردنەوە بوو بەبێ‌ ڕەچاوكردنی ئاستی یاریكردنی هەڵبژاردەی عیراق كە بەلای زۆرێكەوە باش نەبوو، بەڵام ئەو ئاستە ئاساییە بە حوكمی ئەو ڕەوشەی ڕووبەڕووی یاریزانان بۆتەوە، وێڕای یارییە دۆستانەكان كە لە ئاستی پێویستدا نەبوون، بڵاوبوونەوەی پەتای كۆرۆناش لەولاوە بوەستێت”.

لە كۆتایی قسەكانیدا قاسم وتی”بە حوكمی چاودێری و بەدواداچوونی تەكنیكی خۆی پێیوایە، هەڵبژاردەی عیراق لە یارییەكەی لەگەڵ ئێران، بەشێوەیەكی زیاتر گونجا و جێگیر دەردەكەوێت بەراورد بە یارییەكانی پێشوو، بەو پێیەی یارییەكە سیمای تایبەت و ڕەوشی جیاوازیی هەیە”، هیواشی خواست هەڵبژاردەی نیشتمانی عیراق بگاتە ڕۆخی جامی جیهانی و بتوانێت جەماوەر دڵخۆش بكات بە هێنانەدی دەستكەتی مۆندیالی.