سەردێر

نرخی بەنزین هەرزان كرا

خەڵك-
دوای سەرهەڵدانی ناڕەزایی هاووڵاتیان لەسەر گران كردنی نرخی بەنزین، ئەمڕۆ جارێكی دیكە نرخی بەنزین لە شاری هەولێر دابەزی و ئەندامێكی ئەنجوومەنی پارێزگای سلێمانی-ش دەڵێت: “ئەنجوومەن و پارێزگا لە هەوڵدان بۆ هەرزان كردنی نرخی بەنزین”.

ئەمڕۆ یەك شەممە، نرخی بەنزین لە شاری هەولێر دابەزی و یەك لیتر بەنزینی نۆرماڵ بوو بە 550 دینار لەكاتێكدا لە چەند ڕۆژی ڕابردوودا بۆ 650 دینار بەزبووبووەوە، بەڵام هێشتا نرخی بەنزینی موحەسەن و سوپەر دانەبەزیوە.

لای خۆشیەوە، دیمەن ڕەزا، ئەندامی لیژنەی وزە و سامانە سروشتییەكانی ئەنجوومەنی پارێزگای سلێمانی بۆ (خەڵك) ڕایگەیاند، دوو هۆكار بۆ گرانی نرخی بەنزین هەیە، كە یەكێكیان دەرەكییە و ئەوی دیكەیان ناوخۆییە، لە ئەنجوومەنی پارێزگا لەگەڵ پارێزگاری سلێمانی و بەڕێوەبەرایەتییەكانی سووتەمەنی گفتوگۆمان لەسەر ئەوەكرد، كە هۆكاری دەرەكی گران بوونی بەنزین لەدەسەڵاتی ئێمەدا نییە، بەڵام هەنگاو هەڵبنێن بۆ چارەسەركردنی هۆكارە ناوخۆییەكان.

سەبارەت بە هۆكارە ناوخۆییەكانی گران بوونی بەنزین ئەو ئەندامەی ئەنجوومەن وتی، “ئەو بەنزین و سووتەمەنییە، كە لە سنوور داخڵ دەبێت 6 بۆ 7 جۆر پارە وەرگرتن و باج دەخرێتە سەری، كە لەلایەن وەزارەتی سامانە سروشتییەكانەوە دانراوە و بەوەش نرخی زیاتر دەكەوێت”.

سەبارەت بە ڕێگا چارەسەرەكییەكانی هەرزان كردنی بەنزین وتیشی، “هەماهەنگیمان پێكەوە دروست كردووە تا لەگەڵ پەڕلەمان و حكومەت گفتوگۆ بكەین تاوەكو بەڕێنماییەكاندا بچنەوە و هەموو جۆرە باجێك لەسەر سووتەمەنی لاببرێت و تەنها باجی پشكنینی كوالێتی بمێنێتەوە و بەوەش دەبێتە هۆی هەرزان كردنی بەنزین”.