سەردێر

شێخ نەهرۆ، داوا دەكات ئاگری ئاژاوەگێڕی هەڵنەگیرسێنرێت

خەڵك-

شێخ نەهرۆ كەسنەزانی داوایەك ئاڕاستەی حكومەتی عێراق دەكات ڕایدەگەیەنێت، ئاگری ئاژاوەگێڕی هەڵنەگیرسێنرێت و عێراق نەگەڕێتەوە بۆ تایەفەگەرێتی.

شێخ نەهرۆ محەمەد كەسنەزانی سەرۆكی تەریقەتی كەسنەزانییە لەجیهان دا، لە ڕاگەیەنراوێكدا ئاماژە بۆ ئەوە دەكات، ئەو كەسانەی بانگەواز بۆ وێرانكردنی پیرۆزیەكانی موسوڵمانان دەكەن لەناویشیاندا مەرقەدی ئیمام ئەبی حەنیفە نوعمان ڕەزای خوای لێبێت، خۆشكردنی ئاگری ئاژاوەگێڕیە و حەڵاڵكردنی هەموو بەهاكانی خێر و ئاشتی و ڕەحمەتە كە خوا حەرامی كردووە.
وتیشی”ئەو دەنگە نەشازانەی داوای ڕوخاندن و وێرانكردنی مەرقەدی پیرۆزی ئیمام ئەبی حەنیفە دەكەن ئارامی لێبڕیووین و داوا دەكەین هەموو ئەو ئاژاوەگێڕیانە ڕابگیرێن كە مەبەست لێی خوێنڕشتنی بێتاوانەكانە كە خوا حەرامی كردووە، لەكاتێكدا تاوەكو ئێستاش كردارەكانی تایەفەگەرێتی قێزەوەن وەكو یادگاریەكی تاڵو بێزاركەر لەیادماندا ماونەتەوە.

ناوبراو داوای لە حكومەتی عێراق كرد، ئاسایشی ماڵەكانی خوا بپارێزێت و لە ڕێگای هێزە ئەمنیەكانیەوە ئاسایشیان بۆ دابین بكات.