سەردێر

حزبەكانی ڕۆژهەڵات سەرقاڵی خۆڕێكخستنەوە و یەكگرتنەوەن

خەڵك-

سەرۆكی پارتی سەربەستی كوردستان ڕایدەگەیەنێت، خۆشحاڵین حزبەكانی ڕۆژهەڵاتی كوردستان یەكدەگرنەوە.

بەپێی زانیارییەكانی (خەڵك) هەردوو حزبی دیموكراتی ڕۆژهەڵاتی كوردستان سەرقاڵی خۆئامادەكردنن بۆ ڕاگەیاندنی یەكگرتنەوەیان و بڕیارە ئەمساڵ یەكگرتنەكەیان ڕابگەیەنن، هاوكات هەردوو كۆمەڵەش دڵخۆشن بەو كارە و ئەوانیش دەیانەوێت یەكبگرنەوە، بەتایبەت دوای ڕاگەیاندنی یەكگرتنی دیموكراتەكان.

عارف باوەجانی، سەرۆكی پارتی سەربەستی كوردستان بە (خەڵك)ی ڕاگەیاند، وەكو پارتی سەربەستی لە بارەی یەكگرتنی دیموكراتەكان یان یەكگرتنی هەموو هێزەكان هیچ ڕاوێژێكمان پێنەكراوە و هیچ زانیاریم نییە.

وتیشی، “وەكو پارتی سەربەستی پێمانخۆشە هەردوو دیموكرات و هەر دوو كۆمەڵەكان یەكبگرنەوە، ئەمە شتێكی باشە بۆ ڕۆژهەڵاتی كوردستان، بەڵام ئەوەندە وتراوە یەكگردەگرنەوە و یەكناگرنەوە، بابەتەكە خەریكە جێی باوەڕ نەبێت تاكو ڕانەگەیەنرێت”.

ئاشكراشیكرد، زۆرجار ئەو بابەتە سەریهەڵداوە بەتایبەت لەمساڵدا، ئەگەر یەكبگرن كێشەكانی ڕۆژهەڵاتی كوردستانیش كەمتر دەبنەوە و جێگای دڵخۆشییە.

سەبارەت بە یەكگرتنیان لەگەڵ حزبەكانی دیكەی ڕۆژهەڵات ناوبراو ڕوونیكردەوە، پارتی سەربەستی لە هیچ حزبێك دانەبڕاوین تاكو داوای یەكگرتنەوەیان لێبكەین، بەڵام ئێمە هەمیشە هەوڵمانداوە سەربەخۆیخوازان لە دەوری بەرەیەك كۆببینەوە و كاری بۆ بكەین و زۆرجار هەوڵمان بۆداوە و كاری بۆ دەكەین، بەڵام ڕووینەداوە.