سەردێر

قەرەیلان: گەریلا هێرشی نەكردۆتە سەر پێشمەرگە و داوا دەكەم بارزانی ببینم

خەڵك-
موراد قەرەیلان، ئەندامی كۆمیتەی بەڕێوەریی پارتی كرێكارانی كوردستان (پەكەكە) داوای چاوپێكەوتنی ڕاستەوخۆ لە مەسعود بارزانی سەرۆكی پارتی دیموكراتی كوردستان دەكات و دەڵێت، سەرۆكی توركیا داوای لێكردوون، شەڕ لەگەڵ پارتی بكەن، ڕەتیشیدەكاتەوە گەریلا هێرشی كردبێتە سەر پێشمەرگە.

موراد قەرەیلان لەمیانی چاوپێكەوتنێكی لەگەڵ تەلەڤزیۆنی (ستێرك) راِیگەیاند:” ماوەیەك لەمەوبەر لەڕێگەی هەندێك دۆستەوە، ڕەجەب تەیب ئەردۆغان سەرۆكی توركیا، شاندێكی نارد بۆ لامان ‌و پێیڕاگەیاندین كە ئێوە لە باكووری كوردستان ئاگربەست لەگەڵ ئێمە ڕابگەیەنن، ئیتر لە پارچەكانی تر چی دەكەن بیكەن ئێمە حەقمان نییە، ئەمە مانای چییە واتە ئاگربەست لەبەرامبەر ئێمە ڕابگەیەنن ئیتر ناكۆكیتان هەیە لەگەڵ پارتی بڕۆن شەڕ بكەن ‌و ئێمە حەقمان نییە، لەبەرئەوە داوام كرد ڕووبەڕوو مەسعود بارزانی ببینم‌ و ئاگادار بێت كە دەوڵەتی توركیا دەیانەوێت كورد بدەن بەیەكدا و بزانین ئێمە دوژمنێكی وامان هەیە”.

بە وتەی قەریلان:”لە سەردەمێكی بەم شێوەیەشدا كە هێرشی فراوان لەبەرانبەرمان ئەنجام دەدرێت، ئایا چۆن هێرش دەكەینە سەر پێشمەرگە؟ ئایا ئەمە دەچێتە عەقڵەوە؟ بۆچی بە دەستی خۆمان بەرەیەكی دیكەی شەڕ لەبەرانبەری خۆمان بكەینەوە؟ هەر كەسێك كە كەمێك ژیر بێت و لە شەڕێكی بەم شێوەیەدا بێت، لە شەڕی مان و نەماندا بێت، چۆن بەرەی دوەمی شەڕ لەدژی خۆی بكاتەوە؟، هەم لە شوێنێكی وەك مەتینا، ئێستا لە باكوری مەتینا شەڕ هەیە، لە ناو مەتینا بۆچی بەرەیەكی دیكە لەدژی پێشمەرگە بكەینەوە؟ لێرەدا هیچ ژیرییەك نییە و هیچ بناغەیەك بۆ ئەو شتە نییە، واتە گەریلا هێرشی نەكردوەتە سەر پێشمەرگە، ئایا گەریلا شێت بوە بەرەی دوەم لەدژی خۆی بكاتەوە؟”.

ئەندامی كۆمیتەی بەڕێوەریی پارتی كرێكارانی كوردستان (پەكەكە) دەڵێت:””پلانیان هەیە كە ئیلا و بیلا پێشمەرگە لە بەرانبەر گەریلا بۆ شەڕ بەكاربهێنن، ئێمەش هیچ فەرمانێكمان نەداوە كە لەدژی پێشمەرگە شەڕ بكرێت و تەڤگەرەكەمان بە هیچ شێوەیەك بڕیارێكی بەم شێوەیەی نەداوە، ئێمە شەڕی كورد و كورد وەك كارەسات دەبینین، وەك گەورەترین هەڵە دەبینین، واتە هیچ هەڵوێستێكی بەم شێوەیەمان نییە، هیچ فەرمانێكی لەم شێوەیەمان نەداوە و بیر لە بڕیارێكی لەم شێوەیەش ناكەینەوە، بەڵام بە ڕاستی یارییەك هەیە، ئێمە باش دەزانین لەم كاتە مێژووییەدا شەڕی كورد و كورد بۆ داهاتووی گەلی كورد مەترسییەكی گەورە دروست دەكات، نە لە بەرژەوەندی ئێمە و نە لە بەرژەوەندی گەلی كورددایە”.