سەردێر

چاودێرێك: دەبێت بە یەكگرتوویی بەرەنگاری داگیركەران ببینەوە

خەڵك
ماوەی چەند ڕۆژێكە شەڕو پێكدادان لە هەندێك ناوچەی هەرێمی كوردستان هەیە و چەند پێشمەرگەیەكیش گیانیان لەدەستداوە  و بریندار بوون، چاودێرێكی سیاسیش دەڵێت پێویستە سەرجەم هێزەكان پشتی گەریلا بگرن و نابێت ڕەوایەتی بە داگیركەر بدرێت.

عادل عوسمان، چاودێری سیاسی بە (خەڵك) ی ڕاگەیاند، دۆزی كورد لە قۆناغێكی هەستیاردایە، قازانجی كورد لەوەدایە كە لە بەرامبەر ئەو هێرشە داگیركارییەی توركیا دەیكاتە سەری، بەیەكڕیزی و یەكدەنگی پێكەوە بوونێكی سیاسی و نەتەوەیەوە بەرەنگاری ئەو داگیركارییە ببێتەوە، پێویستە سەرجەم هێزە سیاسییەكان پشتی گەریلا بگرن و پێكەوە تێكۆشانێكی هاوبەش بەڕێوە ببەن.

ئاماژەی بەوەشكرد، ئەركی هەر پارت و هێزێكی سیاسیشە لەبەرامبەر ئەو داگیركارییەدا بە لێپرسراوێتی نەتەوەییەوە بێتە پێشەوە، ئەگەر ڕەوایەتی بەهێرشی داگیركەر بدرێت و پەلاماری هێزی نەتەوەیی و دیموكراتیك و شۆڕشگێڕ بدرێت مانای ئەوەیە نێو ماڵی كورد خراپ و پەرتەوازە دەكرێت و بە قازانجی داگیركەر دەیشكێنیتەوە.

وتیشی: كورد هەمیشە لە بەرامبەر داگیركارییەكان بەرخۆدانی كردووە بۆیە داگیركاران دەیانەوێت ئەو هەسەتە نەتەوەییە بشكێنن بۆ ئەوەی ئامانجی لە مێژینەی خۆیان لەسەر سڕینەوەی پێكهاتەو هەبوونە نەتەوەییە جیاوازەكانی ناوچەكە بە دەست بهێنن.

ئاماژەی بەوەشكرد، كاتی ئەم جەنگەی ئێستا ڕوو دەدات زۆر هەستیارە چونكە داگیركەران دەیانەوێت ئەو هەژمونگەراییەی لەسەر كورد و كوردستان هەیانە بیهێڵنەوە و ئامانجەكانیان بپێكن بۆ نموونە توركیا دەیەوێت عوسمانیەتی نوێ‌ دروست بكات و ویلایەتی موسڵ بخاتەوە سەر خاكی خۆی كە بە حسابی خۆی خاكی ئەوە كە دەكاتە باشووری كوردستانی ئێستا.

باسی لەوەشكرد، ئەو شەڕانە درێژ مەودایەو بەردەوامە ئەوەی بۆ ئێمەی كورد گرنگە ئەوەیە كە بتوانین لە پێناوی دەستكەوتە نەتەوەییەكانماندا یەكێتییەكی نەتەوەیی و تێكۆشانێكی هاوبەش دروست بكەین