سەردێر

ڤیدیۆی شوێنی هێرشەكەی سەر پێشمەرگە بڵاوكرایەوە

خەڵك-
لە هێرشێكدا بۆ سەر هێزەكانی پێشمەرگە لە چیای باتیفا بەرەبەیانی ئەمڕۆ ژمارەیەك پێشمەرگە شەهید و بریندار بوون.

بەپێی ئەو ڤیدیۆیەی لەلایەن هێزەكانی پێشمەرگەوە بڵاوكراوەتەوە، لە سەر ڕێگایەكی لاوەكی لە قەدپاڵی چیای باتیفا هێرش كراوەتە سەر هێزێكی پێشمەرگە و بەهۆیەوە 5 پێشمەرگە شەهید و 4ی دیكە بریندار بوون.

سەرەتا میدیای پارتی ڕایگەیاند، كە بە بۆردومانی توركیا 5 پێشمەرگە شەهید و 4ی دیكە بریندار بوو، بەڵام دواتر پێشمەرگە، پەكەكە تۆمەتباری كرد لە ڕاگەیەنراوێكی وەزارەتی پێشمەرگەدا ئاماژە بەوەكرا، كە “هێزێكی پێشمەرگە لەكاتی ئەنجامدانی ئەركێكی سەربازی لەچیای مەتینی قەزای ئامێدی، بەمەبەستی پاراستنی خەڵك و گوندەكانی ئەم ناوچەیە و گەڕاندنەوەی ئاسایش بۆ دەڤەرەكە، لەلایەن هێزێكی (پ ك ك)ەوە بۆسەیەكیان بۆ دانراوە، لە ئەنجامدا پێنج پێشمەرگە شەهید بوون دوو پێشمەرگەی تریش برینداربوون”.

لای خۆشیانەوە، هێزەكانی پاراستنی گەل (هەپەگە) دەڵێن ئێمە نین و نازانین بۆمب تەقیوە یان لایەنی تر بۆردومانی پێشمەرگەی كردووە و لە ڕاگەیەنراوێكدا جەختدەكەنەوە، كە “بۆمان ڕوون نەبووەتەوە كە ئەو زرێپۆشە ئایا مین پێیدا تەقیوەتەوە یان لە لایەن سوپای توركەوە بۆردومان كراون”.

هاوكات پێشمەرگەیەكی برینداری ئەو هێرشە بۆ یەكێك لە میدیاكان دەڵێت: “ئەوە هێرشی پەكەكە نەبووە، فڕۆكە بوو یان مووشەك لە سەقفی سەیارەكەی دا”.