سەردێر

دهۆك.. ئاگر لە كەمپی شاریا كەوتەوە

ئاگرێك لە كەمی شاریا لە پارێزگای دهۆك كە ئاوارە ئێزدییەكان تیایدا نیشتەجێن، كەوتەوە.


دوای نیوەڕۆی ئەمڕۆ هەینی، ئاگرێك لە كەمی شاریا لە پارێزگای دهۆك كە ئاوارە ئێزدییەكان تیایدا نیشتەجێن، كەوتەوە، بە وتەی هاووڵاتییەكی نیشتەجێی كەمپەكە كە باژانسی ئانادۆڵۆی راگەیاندووە، ئاگرەكە بەهۆكارێكی نادیار كەوتووەتەوە.

بەپێی زانیارییەكان، بەهۆی ئاگرەكەوە زیاتر لە ٣٥٠ خێوەتی ئاوارەكان سووتاون.

شایەتحاڵەكان بە ئاژانسەكەیان ڕاگەیاند، دوای رووداوەكە دەستبەجێ تیمەكانی بەرگریی شارستانی گەیشتنە شوێنی رووداوەكە، بەڵام بەهۆی گەورەیی قەبارەی ئاگرەكە و زوو گڕگرتنی خێوەتەكان، ئاگرەكە بە خێرایی تەشەنەی سەندووە و زیانێكی زۆری ماددی لێكەوتەوە.

تاوەكو ئێستا هیچ زانیارییەك لەبارەی كەوتنەوەی زیانی گیانی لەو رووداوەدا نەزانراوە و هیچ روونكردنەوەیەكی فەرمیش بڵاونەكراوەتەوە.

كەمپی شاریا دەكەوێتە باشووری پارێزگای دهۆك و نزیكەی ٣٠ هەزار خێزانی ئێزدیی تیادا نیشتەجێیە كە بەهۆی هێرش و پەلامارەكانی رێكخراوی تیرۆریستی داعش بۆ سەر شنگال لە هاوینی ٢٠١٤دا، ئاوارە بوون و لەو كەمپەدا گیرسانەوە.

بەپێی داتاكانی وەزارەتی كۆچ و كۆچبەرانی عێراق، لە هەرێمی كوردستاندا ٢٧ كەمپی نیشتەجێبوونی ئاوارەكان هەن كە ٧٣٧ هەزار و ٣٦٥ كەس تیایدا نیشتەجێكراون.