سەردێر

كۆچبەرێكی زۆری كورد لە توركیا گیرییان خواردووە

لە چاواڕوانی دەرچووندان

خەڵك-
كۆچبەرێكی زۆری كورد لە هەندێك لە شارە كەنارییەكانی توركیا گیرییان خواردووە و چاوەڕوانی دەرچوون دەكەن بەرەو ئەوروپا، بەڵام بەهۆی چڕكردنەوەی هەوڵی پاسەوانانی دەریایی وڵاتانی سەر دەریای ناوەڕست لانی كەم لەئێستادا بواری دەرچوونیان كەمە.

ئاری جەلال، سەرۆكی ڕێكخراوی لوتكە بۆ كاروباری پەنابەران، لەو بارەیەوە بە (خەڵك)ی ڕاگەیاند:”ڕێگەی قاچاخ و نایاسایی هیچ گرەنتییەكی نییە، گەر توركیاش هەموو دەروازەكانی بەڕووی كۆچبەراندا ئاواڵا بكات، وڵاتانی ئەوروپا بۆ چەند ساڵێكە هەوڵەكانیان بۆ بەرگرتن بە شەپۆلی ڕۆیشتنی كۆچبەران بەرەو وڵاتەكانیان چڕكردۆتەوە، ئەمەش بۆتە مایەی كەمبوونەوەی بواری گەیشتنی كۆچبەرەكان وڵاتانی وەك ئیتاڵیا و یۆنان”.

بە وتەی ئاری جەلال:”لەئێستادا شەپۆلێكی تری كۆچبەران ڕووی لە توركیا كردووە، بەو پێیەی وڵاتێكی سەرەكییە بۆ كەیشتن بە وڵاتانی ئەوروپا، ئەویش لای خۆیەوە دەروازەكامنی كردۆتەوە”.

سەرۆكی ڕێكخراوی لوتكە بۆ كاروباری پەنابەران، هۆكاریی دروستبوونی ئەو تەوژمە، بۆ خراپی بارودۆخی وڵاتانی ناوچەكە و بە تایبەت عیراق و هەرێمی كوردستان دەگێڕێتەوە كە بە بۆچوونی ئەو:”هۆكاریی كۆچكردنی هاووڵاتیان بەهۆی خراپی باری دارایی و نەبوونی هەلی كار و نەبوونی خزمەتگوزارییە سەرەتاییەكانە، دیارە خەڵكیش بەدوای ژیانێكی باشتر و شایستەتردا دەگەڕێن بۆ خۆیان و خێزانەكانیان”.

ئاری جەلال دەڵێت:”ئەوروپاش ئەو بەهەشتە نییە كە كۆچبەر و پەنابەر دەیەوێت ڕووی تێبكات، بەدڵنیاییەوە وڵاتانی ئەوروپا ڕۆژ لە دوای ڕۆژ لە پاشەكشەدان لەڕووی بەدەنگەوەچوونی داخوازیی و داواكاریی مافی پەنابەران، بەو هۆیەی لەو ڕووەوە لۆدێكی زۆرییان لەسەرە”.