سەردێر

پڕۆژەی كتێبخانەی وەرزشی ڕادەگەیەنرێت

خەڵك
بڕیارە پڕۆژەی كتێبخانەیەكی وەرزشی لەپارێزگای سلێمانی ئەنجام بدرێت.

بەڕێوەبەرایەتی وەرزشی سلێمانی لە ڕاگەیەنراوێكدا بڵاویكردەوە، لەنوێترین پڕۆژەدا و بۆ یەكەمین جار لەهەرێمی كوردستان كتێبخانەیەكی وەرزشی كوردی ڕادەگەیەنرێت.

ئاماژە بەوەشكراوە، كتێبخانەكە دەبێتە یەكەمین شوێنی تایبەت بە (كۆكردنەوەو نمایشكردن و پاراستن)ی كتێب و نوسینە وەرزشییە كوردییەكان و دەشبێتە ماڵی دوەمی نوسەرە وەرزشییەكانی هەرێمی كوردستان و دەرەوە كەشوێنێك هەیە بۆ مێژوو كتێبەكانیان دەپارێزێت.

لە ڕاگەیەنراوەكەدا ئەوەش هاتووە، لەدوای تەواوكردنی وردەكاری هۆڵی كتێبخانەكە كەلەناو بینای بەڕێوەبەرایەتی وەرزشی سلێمانیدایە لەگەڕەكی قڕگە، لەڕاگەیاندراوێكدا سەرجەم نوسەرەكان ئاگاداردەكرێنەوە كەدەتوانن كتێب و نوسینەكانیان پێشكەش بەكتێبخانە وەرزشییە كوردییەكە بكەن.

باس لەوەشكراوە، بودجەی پڕۆژەكە لەلایەن پارێزگاری سلێمانیەوە دابینكراوەو بەم زووانە بەڕەسمی و لەمەراسیمێكی تایبەتدا بەڕووی نوسەرو خوێنەراندا دەكرێتەوە.