سەردێر

“لەسەر گۆڕینی كازمی ڕێككەوتن كرا”

خەڵك-
سەركردەیەك لە هاوپەیمانی فەتح، ڕێككەوتنێكی سیاسی لەنێوان ژمارەیەك لە هێزە سیاسییەكان بۆ گۆڕینی مستەفا كازمی، سەرۆك وەزیران ئاشكرا دەكات لە حاڵەتی دواخستنەوەی هەڵبژاردنی پێشوەختە.

سەعد سەعدی، سەركردە لە هاوپەیمانی فەتح لە لێدوانێكی ڕۆژنامەوانیدا ڕایگەیاند”حكومەتەكەی مستەفا كازمی، بە مەبەستێكی سەرەكی و گرنگ پێكهێنرا، كە ئیدارەدانی وڵاتە تا ئەو كاتەی هەڵبژاردنی پەرلەمانی پێشوەختە دەكرێت، ئەویش وادەكەی بۆ دیاری كرد، بەڵام بۆ كاتێكی تر دوایخست، ئەمەش بەچەند هۆكارێك كە بە تەكنیكی ناوی برد، ئەم كارە وێڕای ئەوەی تێبینی لەسەرە، بەڵام هێزە سیاسییەكان پشتیوانییان كرد، تا وادەیەكی نوێی بۆ دیاری بكرێت، كە شیاوی دواخستنەوە نەبێت”.

بە وتەی سەعدی”حكومەتەكەی كازمی جەخت لەسەر ئەنجامدانی هەڵبژاردنی پێشوەختە دەكاتەوە لە تشرینی یەكەمی داهاتوو، بەڵام گەر ئەمجارە پرۆسەكە دوابخات، ئیتر لەبەر هەر هۆكارێك بێت، ئەوا ئاراستەیەك هەیە بۆ كێشانەوەی متمانە لە حكومەت، بەو پێیەی شكستخواردوو بووە لە ئەركە سەرەكییەكەی، كە لێوەی متمانەی پێبەخشراوە”.

جەختیشی كردەوە، لەنێوان هێزە سیاسییە كاریگەرەكاندا ڕێككەوتن لەسەر ئەوە كراوە، كە كازمی بگۆڕدرێت، ئەگەر دووبارە هەڵبژاردنی دواخست”.