سەردێر

تەندروستی سلێمانی: یەكەم حاڵەتی مردن بەكەرووی ڕەش تۆماركرا

خەڵك
جێگری بەڕێوەبەری گشتی تەندروستی سلێمانی ڕایدەگەیەنێت ، ئەمڕۆ یەكەم توشبووی كەڕووی رەش كە دوو هەفتە بوو لەژێر چارەسەردا بوو بەهۆی وەستانی دڵیەوە گیانی لەدەستدا.

هێرش سەلیم، جێگری بەڕێوەبەری گشتی تەندروستی سلێمانی لە لێدوانێكی ڕۆژنامەوانیدا ڕایگەیاندووە، كە توشبووەكە تەمەنی78 ساڵ بوو، جگە كەڕووی رەش، نەخۆشی دڵ و شەكرەی لەگەڵدا بووە، هێشتا دیار نییە بەهۆی كاریگەری كەڕووی رەشەوە مردووە یاخود نا، بەڵام حاڵەتەكەی سەخت بووە.

هاوكات وه‌زاره‌تی ته‌ندروستی حكومه‌تی هه‌رێم ره‌تیده‌كاته‌وه‌، هیچ حاڵه‌تێكی فه‌رمی مردن به‌نه‌خۆشی كه‌ڕوی ره‌ش له‌ سلێمانی تۆماركرابێت و راشیده‌گه‌یه‌نێت، كه‌سێك كه‌ به‌نه‌خۆشی دڵ مردوه‌، گومانێك هه‌یه‌ نه‌خۆشی كه‌ڕوی ره‌شی هه‌بوبێت.

ئەمە لەكاتێكدایە، دوێنێ شەو میدیاكانی عیراق بڵاویانكردەوە، كە یەكەم حاڵەتی مردن بە كەڕووی ڕەش لە پارێزگای ناسریە تۆماركراو و هەڵگرەكە لە نەخۆشخانە گیانی لەدەستداوە .