سەردێر

“یەكێتی و گۆڕان یەك سەرچاوەيان هەیە و ئێستا لەت بوون”

ئەسەسەرد: یەكێتی داوای سیستمی پەڕلەمانی دەكات لە دەستووردا جێگیر بكرێت

خەڵك-

سكرتێری ئەنجومەنی سەركردایەتی یەكێتی ڕایدەگەیەنێت، دەستور زۆر پێویستە بۆ هەرێمی كوردستان هەرچەندە درەنگە، بەڵام ئێستاش بكرێت كارێكی زۆرباشە.

فەرید ئەسەسەرد سكرتێری ئەنجومەنی سەركردایەتی یەكێتی نیشتمانی كوردستان بە دەنگی ئەمریكای ڕاگەیاند، بۆ نووسینی دەستوور لیژنەیەك پێكدێت ئەو ئەركە دەگرنە ئەستۆی خۆیان ئەوە پەیوەندی بەوە نییە مەترسی هەبێت یان نەبێت مەسەلەی ڕیفراندۆمیش لەسەر دەستوور ڕۆژێكی دەوێت لەماوەی 24 كاتژمێردا كۆتایی پێدێت.

وتیشی”هەمان بۆچوونی جارانمان هەیە و چاكترین سیستەم بۆ هەرێمی كوردستان ئەو سیستەمەیە كە لەعێراقدا هەیە كە سیستەمی پەڕلەمانییە، شتێكی شاز دەردەچێت شتێكی نەگونجاو دەردەچێت ئەگەر سیستەم لە هەرێمی كوردستان نەگونجاو بێت لەگەڵ سیستەمی سەرەكی ناوەندا لەبەر ئەوە ئێستاش بۆچونمان وایە سیستەمەكە گونجاوترە ئەگەر سیستەمەكە پەڕلەمانی بێت”.

ئاشكراشیكرد، گفتوگۆی نوێ نەكراوە لەسەر پرسی دەستوور، بەڵام مەسەلەكە هاتووەتە ئاراوە سەركردەكانی هەموو حیزبەكان هیچ كامیان دژی ئەوە نەبووە گەڕێكی تر دەست پێبكەین بۆ ئەوەی دەقێكی دیاریكراوی دەستوور بۆ هەرێمی كوردستان دابین بكەین، پێمانوایە بوونی دەستوور پێویستە، بەشێك لەو كێشانەی ئێستا هەمانە ئەگەر دەستورمان هەبووایە هەر لەسەرەتاوە تووشی نەدەبووین.

ڕوونیشیكردەو، باسكردنی بابەتی دەستوور پەیوەندی بە هەڵبژاردنەوە نییە، هەڵبژاردن مەسەلەیەكە و دەستووریش مەسەلەیەكی ترە.

لە بارەی هێڵی سوری یەكێتی لە پرسی نوسینەوەی دەستووردا ناوبراو ڕایگەیاند، یەكێتی دەستوورێكی مەدەنی و دیموكراتی دەوێت كە گونجاو بێت لەگەڵ پێداویستییەكانی هەرێمی كوردستان، لەڕووی سیستەمی سیاسیەوە پێمانباشە دەستوورەكە پەڕلەمانی بێت واتە نەسەرۆكایەتی بێت و نە نیمچە پەڕلەمانی بێت.

جەختی لەوەش كردەوە، دەنگدان لەسەر دەستوور هیچ ڕێگریەكی لەبەردەمدا نییە، هیچ دەقێك نییە لەم یاسایە لەیاسای پەسەندكردنی دەستوردا باس لەوە بكات كە پێویستە هەموو هاوڵاتییان بەشداری لەدەنگداندا بكەن، لەكۆتایدا هەموو هاوڵاتیەك مافی ئەوەی هەیە بچێت دەنگ بدات لەكاتی دەنگدانیشدا دەتوانێت ڕەتی بكاتەوە یان پەسەندی بكات، ئەگەر 5% ی دانیشتوان بچێت دەنگ بدات بەدەستوور، زۆرینە بەدەست بهێنێت ئەوكاتە دەستورەكە هەر تێدەپەڕێنرێت.

سەبارەت بە هاوپەیمانی یەكێتی و گۆڕان بۆ هەڵبژاردنەكان و كاریگەرییەكانی لەسەر یەكهەڵوێستی ئەو دوو لایەنە، ئەسەسەرد ڕایگەیاند، لەگەڵ گۆڕان ئەم مەسەلەیەمان هێشتا باس نەكردووە، بەڵام ئێمە و گۆڕان یەك سەرچاوەمان هەیە لەبنەڕەتدا كاتی خۆی ئێستا لەت بووین و بووینەتە دوو، لەبەرئەوە لەزۆربەی زۆری مەسەلەكان كە بووینەتە دوو حیزب زۆر لێك نزیكین، پێموانییە كێشەیەكمان هەبێت، كێشەی جیاوازیمان هەبێت لەتێڕوانیین سەبارەت بە مەسەلەی سیستەمی پەڕلەمانی.