سەردێر

سەنتەری هەماهەنگی پێشمەرگە و سوپای عێراق دەكرێتەوە

خەڵك-

ئەمڕۆ سەنتەری هەماهەنگی نێوان هێزەكانی پێشمەرگە و هێزە عێراقییەكان لە سەربازگەی (كەی وەن) لە كەركووك دەكرێتەوە و هەشت ئەفسەری لیوای یەك و دووی سەر بە وەزارەتی پێشمەرگە دەچنە كەركوك و دەوامی فەرمی لەوێ دەكەن و جێگری لێپرسراوی مەڵبەندی حەمرینی یەكێتیی نیشتمانیی كوردستانیش ڕەخنە لە شێوازی كارەكان دەگرێت.

تەحسین خەفاجی وتەبێژی ئۆپەراسیۆنە هاوبەشەكانی عێراق لە لێدوانێكی ڕۆژنامەوانیدا ڕایگەیاند، ئەو سەنتەرە لە سەرەتاوە ئاڵوگۆڕی زانیاریی هەواڵگریی دەكەن، لە ژێر فەرمانی هەولێر و بەغدا، هەر لەم هەفتەیە بڕیارە چەند سەنتەری دیكەی هەمەهەنگی بكرێنەوە.

وتیشی”لە ئایندەیەكی نزیكیشدا ئۆپەراسیۆن و كیۆماڵكردنی هاوبەش لەو ناوچانە ئەنجام دەدەن، كە بۆشایی ئەمنیی هەیە و چەكدارانی داعش جموجۆڵی تێدا دەكەن”.

ئاشكراشیكرد، ئەو ئەفسەرانەی نوێنەرایەتیی حكومەتی هەرێم دەكەن یان عێراق، بەشێك دەبن لە ئاڵوگۆڕیی زانیاریی زۆر گرنگ، تاكو بتوانین كردەوەكانی داعش بەرتەسك بكەینەوە.

لای خۆشییەوە محەمەد مەحموود جێگری لێپرسراوی مەڵبەندی حەمرینی یەكێتیی نیشتمانیی كوردستان بە (خەڵك)ی ڕاگەیاند، بەداخەوە ئەو سەنتەرانەی باسی لێوە دەكرێت لە خانەقین و كەركوك، لە سنووری ئێمە كە دوزخورماتووە ناوی لە هیچ شوێنێك نییە بۆ ئەوەی ژووری عەمەلیاتی بۆ بكەنەوە.

وتیشی”زۆر نیگەرانین و ناوی ناوچەكەیان نییە بەشێوەیەكە كە سەر بە چ ژوورێكی عەمەلیات بێت یان بە سەربەخۆ ژوورێكی بۆ بكەنەوە”.