سەردێر

ئەو گەنجەی خۆی سوتاند ئەندامی حزبێكی ڕۆژهەڵات بووە

خەڵك-

ڕێكخراوی مافی مرۆڤی هەنگاو ڕایدەگەیەنێت، پەنابەرێكی ڕۆژهەڵاتی كوردستان كە ماوەی ٤ ساڵە لە هەرێمی كوردستان لە دۆخیكی نالەبار و بە بێ دەستگەیشتن بە كەمترین خزمەتگوزاری نیشتەجێیە، وەك نیشانەیەك بۆ ناڕەزایی لەو دۆخەی لە بەرانبەر بینای UN ئاگری لە جەستەی خۆی بەردا.

ڕێكخراوی مافی مرۆڤی هەنگاو لە ڕاگەیەنراوێكدا ئاماژە بۆ ئەوە دەكات، نیوەڕۆی دوێنێ سێ شەممە ١٨ی ئابی ٢٠٢١ دوو پەنابەری ڕۆژهەڵاتی كوردستان لە بەرانبەر بینای نەتەوە یەكگرتووەكان لە شاری هەولێر مانیان گرتبوو كە یەكێكیان ئاگری لە جەستەی خۆی بەردا.

ئاشكراشیكرد، پەنابەرەكە ناوی “بێهزاد مەحموودی ” تەمەن ٢٥ ساڵ و خەڵكی بۆكانە و لەبەردەم كەناڵەكانی ڕاگەیاندن ڕایگەیاند، چوار ساڵە لێرەین و هیچ مافێكمان نیە و UN هیچ وڵامێكمان ناداتەوە و داواكارییەكانمان پشتگوێ دەخات.
وتیشی”ئێمە وتوومانە ئەگەر داواكارییەكانمان جێبەجێ نەكەن ئەوا خۆمان دەسوتێنین، بەڵام فەرمانبەرانی UN بە ئێمەیان وتووە، “لیرە خۆتان نەسووتێنن با هیچ خەسارێك بە ئێمە نەگات”.

هەنگاو ئاشكرایكرد، بێهزاد (محەمەد) مەحموودی چالاكی سیاسی و ئەندامی سازمانی خەبات بووە.