سەردێر

بەرهەم ساڵح هەڵوێستی لەسەر شەڕی فەلەستین ڕاگەیاند

خەڵك-
لەمیانی پێشوازیكردنی لە باڵیۆزی فەلەستین، سەرۆك كۆماری عێراق جەختدەكاتەوە لە هەڵوێستی نەگۆڕی وڵاتەكەی بۆ پاڵپشتی كردن لە دۆزی فەلەستین و پێویستی كاركردنی جددی بۆ كۆتایی هێنان بە دەستدرێژییەكان بۆ سەر گەلی فەلەستین.

بەپێی ڕاگەیەنراوێكی سەرۆكایەتی كۆماری عێراق، د. بەرهەم ساڵح، سەرۆك كۆمار ئەمڕۆ سێ شەممە ٢٠٢١/٥/١٨ لە كۆشكی سەلام لە بەغدا پێشوازیكرد ئەحمەد عەقل، باڵیۆزی فەلەستین لە عێراق.

لە دیدارەكەدا گفتوگۆكرا دەربارەی پێشهاتەكانی دۆخی قودس و فەلەستین و ئەو پێشێلكاری و دەستدرێژییە نامرۆڤانەی كە گەلی فەلەستین ڕووبەڕووی دەبێتەوە لە شاری قودس و كەرتی غەزە و بەوهۆیەوە چەندین ھاووڵاتی سڤیل بوونەتە قوربانی، هەروەها دووپاتكرایەوە لە ڕاگرتنی ئەو كارانەی دژ بە مافەكانی مرۆڤ و یاسا نێودەوڵەتییەكانە.

سەرۆك كۆمار جەختیكردەوە لە هەڵوێستی عێراق لەبارەی پشتیوانیكردن لە دۆزی فەلەستین و پاڵپشتیكردنی لەسەر ئاستی نێودەوڵەتی بۆ ھێنانەدی داواكاری و مافە رەواكانی گەلی فەلەستین و وتیشی، “پێویستە هەماهەنگی و كاری جددی بكرێت لە سەر ئاستی ناوچەكە و نێودەوڵەتی بۆ كۆتایی هێنان بە نەهامەتییەكان و پاراستنی مافی گەلی فەلەستین و ڕێگریكردن لەو دەستدرێژیانەی ڕووبەڕووی دەبنەوە”.

لەلای خۆیەوە ئەحمەد عەقل، سوپاس و ڕێزی خۆی ئاڕاستەی سەرۆك كۆمار كرد، ھەروەھا بەبایەخەوە باسی لە هەڵوێستی فەرمی و سیاسی و گەلی عێراق كرد بۆ پاڵپشتیكردن لە گەلی فەلەستین و پشتیوانیكردن لە مافەكانی گەلی فەلەستین و دۆزە ڕەواكەی، ھاوكات پابەندبوونی عێراقی بۆ ھێنانەدی تەواوی مافە ڕەواكانی و وەستانەوە دژ بەو دەستدرێژیانەی ڕووبەڕووی گەلی فەلەستین دەبێتەوە بەرز نرخاند.