سەردێر

لە ناوچەیەكی هەرێم ژمارەیەكی زۆری ماسی مردار دەبنەوە

خەڵك-
بەهۆی كەمبوونەوەی ئاستی ئاوی دەریاچە و ڕووبارەكان، كارەساتێكی ژینگەیی بەشێكی ناوچەكانی هەرێم دەگرێتەوە و بەهۆیەوە لە پشدەر ژمارەیەكی زۆری ماسی مردار دەبنەوە.

ئەمساڵ بەهۆی كەمی باران بارین و دابەزینی ئاستی ئاوی دەریاچە و ڕوووبارەكان، زەنگی وشكەساڵی لە هەرێم لێدراوە و حكومەتی هەرێم بڕیارە بودجەیەك بۆ ڕووبەڕووبوونەوەی تەرخان بكات و هەر بەو هۆیەشەوە لە دوو هەفتەی ڕابردوودا بە چەند مەرجێك ڕێگا بە جوتیاران درا بیر لێبدەن بۆ ڕێگری لە لەناچوونی كشتوكاڵ و ڕەز و باخەكان.

بەپێی زانیارییەكان، بەهۆی وشكەساڵی و كەم بوونەوەی ئاوی زێی بچووك لەسنوری ناوچەی پشدەر لە ئیدارەی ڕاپەڕین كۆمەڵێكی زۆر ماسی لە قەراغی چەم و ڕووبارەكان جێماوون و گیریان خواردووە و بە سەدان ماسی-ش مردار بوونەوە.

بۆ بەدواداچوونی ئەو پرسە (خەڵك) پەیوەندی كرد بە بێگەرد تاڵەبانی، وەزیری كشتوكاڵ و سەرچاوەكانی ئاوی هەرێم، بەڵام پەیوەندییەكەی بەردەست نەبوو.