سەردێر

ئەمساڵ هاووڵاتیان وەك پێویست ئامادەكاری بۆ جەژن ناكەن

خەڵك-ئارام سەردار
سەڕەڕای هەڵوەشاندنەوەی بڕیاری قەدەغەی هاتووچۆ لەڕۆژانی جەژنی ڕەمەزان، كاسبكاران ڕایدەگەیەنن بەراورد بەساڵانی ڕابڕدوو بازاڕ وەك پێویست نیە و كەلوپەلێكی زۆریشمان بەسەردا ماوەتەوە.

ئیدریس محەمەد، خاوەنی دوكانی فرۆشتنی چەرەسات و شیرینیە بە(خەڵك)ی ڕاگەیاند، بڕیاری قەدەغە هاتووچۆ لەجەژن بڕیارێكی كتوپڕبوو، چونكە ئەوان پێشتر خۆیان ئامادەكردبوو بۆ جەژن و كاڵایەكی زۆریان هێنابوو، وایكرد بازاڕ بوەستێت، لە چەند ڕۆژێ ڕابردووش هەڵوەشاندنەوەی بڕیارەكە كارێكی باش بوو، بەڵام وەك پێویست كاریگەری نەبووە و هاووڵاتیان كەمتر ڕوو لەكڕینی پێداویستی جەژن دەكەن، ئەگەر بشكڕن وەك ساڵان نیە.

هاوكات یوسف سەلام، یەكێكی ترە لەكاسبكارەكان دەڵێت، “هاووڵاتیان بەهۆی قەیرانی دارایی بەتایبەت دواكەوتنی مووچە لەچەند مانگی ڕابردوو وایكردوە پارەی پێویستیان لەبەردەستدا نەماوە، بەهۆی دانەوەی قەرز و كرێی خانوو، لەهەمان كاتدا بەهۆی كۆرۆناوە هاووڵاتیان وەك پێویست ئامادەكاری بۆجەژن ناكەن”.

لای خۆشیەوە یەكێكی تر لەكاسبكاران بەناوی دڵدار كاكەشین وتی، “ئەوەی زیاتر هاووڵاتیان ڕووی تێ دەكەن كڕینی پێداویستیە بۆ منداڵان، زیاتر پێداویستی منداڵان دەفرۆشرێت بەتایبەت جلوبەرگ و پێڵاو، چونكە ئێستا دۆخی دارایی هاووڵاتیان بەم شێوەیە باش نیە، بتوانن هەموو پێداویستیەك هەم بۆخۆیان و هەم بۆ ماڵ بیكڕن”.

ئەوەشی خستەڕوو، هەڵگرتنی قەدەغەی هاتووچۆ لەجەژن، كاریگەری لەسەرە بازاڕەكان دروست كردوە، بەڵام هاوشێوەی جەژنی ساڵانی بەر لەكۆرۆنا نیە.