سەردێر

بەرپرسێكی سیاسی كورد لە كەركوك هەڕەشەی كوشتنی لێدەكرێت

خەڵك-

بەرپرسی مەڵبەندی كەركوكی بزووتنەوەی ئیسلامی ڕایدەگەیەنێت، هەڕەشەی كوشتنم لێكراوە.

حەسەن شێخانی بەرپرسی مەڵبەندی كەركوكی بزووتنەوەی ئیسلامی بە (خەڵك)ی ڕاگەیاند، شەوی ڕابردوو لەكاتی خۆئامادەكردنمان بۆ نوێژی شێوان بینیمان لە دەرەوە نامەیەك هەڵواسراوە بە دەرگاكەدا و هەڕەشەی تێدایە و فیشەكیان تێدا داناوە و پەیامەكەش ئەوەیە كە دەڵێت “ئێرە چۆڵ بكە و لێرە مەمێنە”.

وتیشی”خوێندنەوەمان بۆ بابەتەكە ئەوەیە كە ئێمە داكۆكیكارێكی سەخت بووین بۆ هەموو پێكهاتەكانی شاری كەركوك بە عەرەب و توركمان و عەرب و تەنانەت مەسیحی و كاكەییەكانیش، وتومانە لێرە ئیدارەیەكی سەپێنراوە بەسەر شارەكەدا هەیە”.
ئاشكراشیكرد، كەركوك تاكە پارێزگایە بەپێی بەركەوتەی هەڵبژاردن پارێزگاری بۆ دانەنراوە، ڕۆژانە بەڕێوەبەرە كوردەكان دەگۆڕدرێن و سیاسەتێكی شۆڤێنیانە لەم شارە بەرپا دەكرێت و هەمان سیاسەتەكانی پێش 2003یە تەنها ناو و ناونیشانەكەی گۆڕاوە.
ڕوونیشیكردەوە، ئێمە ڕەخنەمان لە سیستەمی یاسای هەڵبژاردن و كاری كۆمسیۆن گرتووە، دەیان ساڵە قسە دەكەین واتێدەگەین داكۆكارێكی سەخت بووین بۆ نەتەوەكەمان.
شێخانی ڕاشیگەیاند، ئێمە خۆمان كاندید كردووە لە پڕۆسەی هەڵبژاردنەكان، لەوانەیە خەڵكانێك بیانەوێت بەم شێوەیە لە پڕۆسەكە دووربكەوینەوە، كەوا ویستومانە نوێنەرێكی ڕاستەقینەی خەڵكی كەركوك بین، گومانیشنان لەوانەیە كەوا كەسانێك هەیە نایانەوێت پڕۆسەی سیاسی لە عێراق سەقامگیر بێت و دەستوور جێبەجێ بكرێت و مادەی 140 جێبەجێ بكرێت، كەسانێك نایانەوێت كورد لەم شارە هەبێت و سەقامگیری لە شارەكە هەبێت كە بەشێوەیەك شەوانە وەك شاری دێوەزمەی لێدێت و هیچ خزمەتگوزارییەك لە شارەكە بوونی نییە و چەند مانگێكی دیكە بەرەو هاوین دەڕۆین دەیان نەخۆشی بڵاودەبێتەوە.
جەختی لەوەش كردەوە، كەسانێك بەناوی دەستەیەك یان حكومەتەوە پێمان دەڵێن بڕۆن، ئێمەش بەوان دەڵێن ئێوە دەڕۆن، ئێمە هەر دەمێنینەوە لەم شارەشدا بەرگری دەكەین لەهەموو پێكهاتەكان بێ جیاوازی.