سەردێر

پۆلیسی دهۆك؛ لەسەر دوو ڕووداوی كوشتن 22 تۆمەتبار دەستگیركراوە

خەڵك
بەڕێوەبەرایەتی پۆلیسی دهۆك ڕایدەگەیەنێت، لە ماوەی هەفتەی رابردوو لە سنووری شارۆچكەی شێخان لەسەر 2 ڕووداوی كوشتن 22 تۆمەتباریان دەستگیركردووە.

هێمن سلێمان، وتەبێژی پۆلیسی پارێزگای دهۆك لە كۆنگرەیەكی رۆژنامەوانیدا رایگەیاند، كاژمێر 11ی شەوی هەینی 7ی ئەم مانگە لە ڕووداوێكی شەڕكردن لەنێوان دوو بنەماڵە لە سەنتەری ناحیەی كەڵەكچی كە لەسەر كێشەیەكی كۆمەڵایەتی دوو كەس كوژران، كە هاوژینی یەكتربوون ژنەكە تەمەن 40 ساڵ و پیاوەكەش 50 ساڵ بووە.

دەشڵێت،”دوای رووداوەكە پۆلیسی شێخان و چالاكە مەدەنییەكان و پۆلیسی نەهێشتنی تاوان لە شوێنی رووداوكە ئامادەبوون و هەر ئەوكات 5 تۆمەتبار دەستگیركران، كە بەشداربوون لە شەڕەكە، فەرمانی دەستگیركردنیش بۆ 5 تۆمەتباری دیكە دەرچوو، كە بكوژەكان بوون، ئەو دووكەسەی كە گیانیشیان لەدەستدابوو ڕەوانەی پزیشكی دادی دهۆك كران”.

ڕاشیگەیاند، ئەو 5 تۆمەتبارەی دەستگیرنەكرابوون و فەرمانی دەستگیركردنیان بۆ دەرچووبوو، 3 تۆمەتباریان هەڵاتبوون بۆ پارێزگای موسڵ و دوو تۆمەتبارەكەی دیكەش چووبوونە سەنتەری شاری دهۆك، لەچەند رۆژی رابردوو پۆلیسی شێخان بە هاوئاهەنگی لەگەڵ پۆلیسی دهۆك توانیان ئەو دوو تۆمەتبارە دەستگیر بكەن.

ئاماژەی بۆ ئەوەشكرد، ئەو سێ تۆمەتبارەشی كە چووبوونە پارێزگای موسڵ، دوا بەدواداچوونێكی وردی پۆلیس توانیان شوێنی ئەو تۆمەتبارانە دەستنیشان بكەن، كە لە چ گەڕەكێك و لە چ ماڵێكدان، دوای گۆڕینەوەی زانیاری لەنێوان پۆلیسی ئێمە و پۆلیسی فیدراڵی توانرا شەوی رابردوو هەرسێ تۆمەتبارەكە دەستگیر بكرێن و ئێستا رەوانەی پۆلیسی شێخان كراون.

هاوكات لە رووداوێكی دیكەدا لە گوندی تاك حەرب سەر بە شارەدێی زیلكان لە سنووری شارۆچكەی شێخان، كە شەوی رابردوو لەنێوان دوو بنەماڵەی بە نەتەوە عەرەب لەسەر كێشەیەكی عەشائیری روویدابوو، گەنجێكی تەمەن 40 ساڵ كوژرا و 3 كەسی دیكەش برینداربوون ، لەسەر ئەو رووداوەش 12 تۆمەتبار دەستگیركران، بكوژەكە گەنجێكی تەمەن 25 ساڵ بوو، لەگەڵ 11 كەسی دیكە كە بەشدارببوون لە شەڕەكە دەستبەسەركران.