سەردێر

هیچ وادەیەك بۆ دەستپێكردنەوەی گفتوگۆكانی كوردی-كوردی لە ئارادا نییە

خەڵك-

ئەندامێكی نوێنەرایەتیی ڕێڤەبەری خۆسەری ڕۆژئاوا لەباشووری كوردستان ڕایدەگەیەنێت، وادەیەك بۆ دەستپێكردنەوەی گفتوگۆكانی كوردی – كوردی دیاری نەكراوە.

دوای چەندین كۆبوونەوە و گفتوگۆ بە نوێنەرایەتی ئەمریكا، بەڵام كێشەكانی ڕۆژئاوای كوردستان لەنێوان (ئەنەكەسە و ڕێڤەبەری خۆسەری ڕۆژئاوا) چارەسەر نەكراون و بەهۆی هەڵبژاردنەكانی ئەمریكاشەوە گفتوگۆكان وەستان و تا ئێستاش هیچ ڕوئیایەك بۆ دەستپێكردنەوەی گفتوگۆكان نییە.

فەتحوڵڵا حوسەینی، ئەندامی نوێنەرایەتیی ڕێڤەبەری خۆسەری ڕۆژئاوا لەباشووری كوردستان بە (خەڵك)ی ڕاگەیاند، تاكو ئێستا كاتژمێری سفر دیار نییە بۆ دەستپێكردنەوەی گفتوگۆكان، بەڵام هەوڵەكان بۆ ئەو مەبەستە بەردەوامن.

وتیشی، “نێردراوی ئەمریكا و پارتە كوردستانییەكان لەسەر خەتن و هەردوولاش ئیرادەی دەستپێكردنەوەی گفتوگۆكانیان هەیە”.

ئاشكراشیكرد، هەندێ مەرجی ئەنەكەسە هەیە، بەڵام كاتی ئەوە نییە ئێمە باسی بكەین، بەڵام ئەگەر فشارێك هەبێت لەلایەن پارتییەوە بۆسەر ئەنەكەسە ئەوە بەدڵنیاییەوە گفتوگۆكان دەستپێدەكەنەوە، بەڵام دیارە تاكو ئێستا ئۆكەیەك لەلایەن پارتییەوە بۆ ئەنەكەسە نییە بۆ دەستپێكردنەوەی گفتوگۆكان.

جەختیشی كردەوە، ئێمە ئامادەین و مەرجەكانمان دیارە، كە ئەوەیە ڕێڤەبەری خۆسەر هەیە و دەزگامان هەیە، ئەو برادەرانە بێن و شوێنی خۆیان لەو دەزگایانە وەربگرن، بەڵام لای ئەوان بڕیار نییە، تەنها گفتوگۆ دەكەن.