سەردێر

لە سلێمانی 50 نەشتەرگەری بۆ نەخۆشانی تالاسیمیا ئەنجام دەدرێت

سلێمانی ـ نزار جەزا

ئەمڕۆ شەممە لەساڵڕۆژی جیهانی تالاسیمیادا بڕیار لەئەنجامدانی 50 نەشتەرگەری بۆ نەخۆشانی تالاسیمیا درا.

ئەمرۆ 8ی ئایار “ڕۆژی جیهانی تالاسیمیا”یە و كۆمەڵەی تالاسیمیا و شاری پزیشكی ئەنوەر شێخە و سەنتەری تالاسیمیای سلێمانی پڕۆژەیەكی خێرخوازییان واژۆكرد.

پڕۆژەكە بۆ ئەنجامدانی زیاتر لە 50 نەشتەرگەرییە بۆ تووشبووانی تالاسیمیا لەلایەن شاری پزیشكی ئەنوەر شێخەوە بەشێوەی خێرخوازی.

نەشتەرگەرییەكان بریتین لە ژمارەیەك نەشتەرگەری جۆراوجۆر، كە پێویستن بۆ نەخۆشانی تالاسیمیا.

بەپێی نوێترین ئامار لەماوەی ئەمساڵدا لەسلێمانی یەك تووشبووی تالاسیمیا تۆماركراوە، لە هەولێر 45 حاڵەت.

بەكۆی گشتی لەهەرێمی كوردستان نزیكەی چوار هەزار تووشبووی تالاسیمیا هەن.

د. سەباح هەورامی، بەڕێوەبەری تەندروستی سلێمانی لەكۆنفڕانسێكی ڕۆژنامەوانیدا ڕایگەیاند، پێویستە گرنگی زیاتر بەم كەسانە بدرێت، چونكە بەردەوام پێویستیان بەچارەسەرە.

ئاماژەی بەئەوەشدا، داوا لەو كەسانە دەكەین، كە دەتوانن دەستی هاوكاری درێژبكەن، با هاوكاری ئەم نەخۆشانە بكەن لەڕووی تەندروستییەوە، چونكە كەرتی حكومی بەهۆی قەیرانی داراییەوە ناتوانێت هەموو خزمەتگوزارییەكیان پێشكەش بكەن.

كۆچەر كەریم، سەرۆكی كۆمەڵەی تالاسیمیای سلێمانی ڕایگەیاند، داواكارن زیاتر گرنگییان پێبدرێت، چونكە بەردەوام چارەسەریان پێویستە.

كۆمەڵەی تالاسیمیای سلێمانی ژمارەیەك داواكاری هەیە، كە پێكهاتوون لەم خاڵانەی خوارەوە:

١ -دابینكردنی مووچە بۆ ھەموو ئەو توشبوانەی تالاسیمیا كە مووچەیانیە و لە ساڵی ٢٠١٢ وە ڕاگیراوە.
٢-دابین كردنی ھەموو ئەو پێداویستی و چارەسەرانەی كە پێویست بۆ توشبوانی تالاسیمیا.
٣_سالانە وەزارەتی كارو كارو باری كۆمەڵایەتی و وەزارەتی تەندروستی بەرنامەی تایبەتیان ھەبێت بۆ خزمەتكردنی توشبوانی تالاسیمیا.
٤-زیادكردنی مووچەی توشبوانی تالاسیمیا كە بتوانن پێداویستیەكانی خۆیانی پێ جێبەجێبكەن.
٥ـ هاوكاری و پشتیوانی لە كۆمەڵەی تالاسیمیا لە بەرنامەی كۆنترۆڵ كردن و ڕێگری كردن لە زیاد بونی نەخۆشی تالاسیمیا.
٦- دامەزراندنی ئەو توشبوانەی تالاسیمیا كە خوێندنیان تەواو كردوە.
٧- یارمەتیدان و ھاوكاریكردنی بژێوی ژیانی خێزەنەكانی تالاسیمیا.
٨- دابینكردنی ھەموو ئەو ئامێر و پێداویستیانەی گرنگن بۆ سەنتەرەكانی تالاسیمیا.