سەردێر

پسپۆڕێكی یاسایی: بارزانی دەتوانێت لێبوردنى تایبەت دەربكات

خەڵك-
حاكم شێخ لەتیف، پسپۆڕ و شارەزایی یاسایی پێیوایە سەرۆكی هەرێمی كوردستان دەتوانێت لێبوردنی تایبەت بۆ چالاكوانە دەستگیركراوەكانی بادینان دەربكات، كە پێشتر بۆخۆی هەنگاوەكەی بە زیانگەیاندن بە ناوبانگی هەرێمی كوردستان لەقەڵەمدابوو. .


حاكم شێخ لەتیف، لەپەیجی تایبەتی خۆی لەسەر تۆڕی كۆمەڵایەتی (فەیسبوك) نوسیویەتی” دەستەی سزایی دادگای پێداچونەوە بەداخەوە بریاری سزادانی رۆژنامەنوسان و چالاكوانانی بادینانی بەزۆرینە پەسەند كرد، بۆیە ئێستا تۆپ لەساحەی سەرۆكی ھەرێمە، كە خۆشی رایگەیاندبو ئەو حوكمە نادادپەروەرەو كاریگەری خراپیشی بۆ ناوبانگی ھەرێم ھەیە، با بفەرموێت بەگوێرەی دەسەڵاتەكانی لێبوردنی تایبەتییان بۆ دەربكات بەگوێرەی یاسای سەرۆكایەتی ھەرێم”.

بەپێی بڕێك كە لەلایەن دەستەی سزایی دادگای پێداچونەوەی هەرێم لە 28ی نیسان بە واژۆی عەبدوڵا عەلی ئەحمەد شرفانی سەرۆكی دادگای پێداچونەوە دەرچوە دەركرا،بەگوێرەی یاسای ژمارە 21ی ساڵی 2003 برگەكانی 47، 48 و 49 بڕیاری دادگا بۆ شەش ساڵ زیندانیكردنی (شێروان شێروانی، ئەیاد كەرەم، گوهدار محەمەد ئەمین، شڤان سەعید و هاریوان عیسا) بڕیارێكی دروستە و لەگەڵ یاسادا گونجاوە.

هەر لە بڕیارەكەدا هاتووە”بەگوێرەی بەڵگەكان كە پێشكەشكراون و سزادراوانیش لەبەردەم داوەری لێكۆڵینەوەدا دانیان ناوە بە دروستكردنی گروپێك بەسەرۆكایەتی (شێروان ئەمین) و كاریانكردوە بۆ لێدان لەپێگەی هەستیارەكانی هەرێم و زیانگەیاندن بە ئاسایشی هەرێمی كوردستان، ئەویش لەرێگەی پەیوەندیكردن بە كەسانی بیانی بۆ ئەنجامدانی كاری تێكدەرانە”.