سەردێر

ئەندامانی باندێكی بازرگانی بە كچ و منداڵەوە دەستگیركران

خەڵك-
وەزارەتی ناوخۆی عیراق، دەستگیركردنی باندێك ڕادەگەیەنێت كە بازرگانییان بە مرۆڤەوە كردووە لە بەغدای پایتەخت.

بەپێیی بەیاننامەیەك كە لەلایەن وەزارەتی ناوخۆی عیراقەوە بڵاوكرایەوە”هێزێك لە بەڕێوەبەرایەتی بنبڕكردنی تاوان لە بەغدا/ نوسینگەی ڕەسافە بۆ بنبڕكردنی تاوان و بازرگانی بە ئەندامی جەستەی مرۆڤ، توانیان باندێك دەستگیربكەن كە لە هەشت تۆمەتبار پێكدێن و بازرگانیان بە كچ و منداڵە ئاوارە و پەڕاگەندەكانەوە كردووە و لەبەرانبەر بڕێك پارەدا كڕین و فرۆشتی بە كەسەكانەوە كراوە”.

هەر لە بەیاننامەكەدا هاتووە”پرۆسەی دەستگیركردنەكە، دوای چاودێریكردنی جموجۆڵی یەكێك لە ئەندامانی باندەكە و دەستگیركردنی بوو كە ئەویش لە كاتی لێكۆڵینەوەكاندا دانی بەوەدا نابوو كە لە چوارچێوەی ئەو باندەدا كاردەكات، لە دوای وەرگرتنی ڕەزامەندی فەرمی و یاسایی و بە چاوساغی تۆمەتبارە دەستگیركراوەكە، پاشماوەی ئەندامانی تری باندەكە دەستگیركران كە لە شەش پیاو و ژنێك پێكدێن”.

بەڕێوەبەرایەتی بنبڕكردنی تاوانيش دەڵێت”ڕێكارە یاساییەكان بەپێی ماددەی (6)ی یاسای بازرگانی بە مۆۆڤەوە لە دژی بە هەموو تۆمەتبارەكان دەگیرێتەبەر.