سەردێر

“حزبە گەندەڵەكان یاسای هەڵبژاردنیان بۆ بەرژەوەندی خۆیان قۆستەوە”

حزبە بچووكەكان دەنگەكان دەبەخشن بە حزبە گەورەكان

خەڵك-
ژمارەیەك لە یاساناسی عێراقی رایانگەیاندووە كە یاسای نوێی عێراق ئامانجی ئەوە بوو كە كەسانی سەربەخۆ و بێلایەن لە چینەكانی خوارەوە خۆیان هەڵبژێرن و بچنە پەرلەمانەوە، بەڵام ئەم ئامانجە نەهاتەدی.

یاساناسان و بەشێك لە پەرلەمانتاران روونیانكردەوە بۆ هەڵبژاردنە پێشوەختەكەی عێراق كەمتری كەسی بێلایەن خۆی كاندیدكردووە، زۆرینەی ئەندام و كادر و لایەنگر یان بەلامی كەمەوە هەڵبژێردراوی حزبە گەندەڵەكانی عێراق خۆیان كاندیدكردووە.

حزبە گەندەڵەكانی عێراق لەلایەن زۆرێك لە ناڕازییەكانەوە ئاماژەیە بۆ ئەو حزبانەی دەستیان هەیە لە گەندەڵییەكانی عێراق و گەیاندنی عێراق بە رۆژێك كە بووەتە سەرچاوەی زۆری گەندەڵی، ناشەفافی، دیارنەمان و بەقاچاخبردنە دەرەوەی پارە، وێرانكردنی بوارەكانی خزمەتگوزاری بەتایبەت تەندروستی، پەروەردە، كارەبا، ئاوەدانكردنەوە، هەلی كار، ئەمن و ئاسایش.

چاودێرێكی سیاسی ڕایدەگەیەنێت، هەڵبژاردنەكان بۆ شەرعیەتدانەوەیە بە حزبە دەسەڵاتدارەكان.

بەهۆی فشارەكانی خۆپیشاندانەكانی عێراق، هەڵبژاردنەكانی عێراق پێشخران و بڕیارە لە 10ی ئۆكتۆبەری ئەمساڵ بەڕێوە بچێت و كۆمسیۆنی باڵای هەڵبژاردنەانیش سەرقاڵی ئامادەكارییە بۆ ئەو پرسە و سەرەتای ئەم مانگەش كۆتا وادەبوو بۆ پێشكەشكردنی هاوپەیمانی و ناوی كاندیدەكان.

عەبدوڵڵا ڕێشاوی چاودێری سیاسی بە (خەڵك)ی ڕاگەیاند، ئەم حزبانەی ئێستا باڵادەستن، دووبارە بەم هەڵبژاردنەش دەتوانن باڵادەستی خۆیان بسەلمێننەوە، چونكە بۆ ئەوان قورس نییە، بەڵكو بۆ حزبە بچوكەكان قورسە كە دەسەڵاتدار نین.

وتیشی”ئەمە یەكێك بوو لەو هەڵانەی كە خۆپیشاندەران و هێزی ناڕازی كردیان كە وایانزانی ئەگەر سیستەمەكە بەو شێوەیەی لێبێت حزبە گەورەكان شكست دەهێنن”.

ئاشكراشیكرد، سەدرییەكان و پارتی و یەكێتی و ئەوانی دیكەش دەنگی خۆیان دەهێنن، بەداخەوە حزبە بچوكەكانیش لەبری دژایەتی حزبە گەورەكان، ئێستا چوون دەنگی خۆیان دەدەنە حزبە گەورەكان، هەموو ڕەوشەكە لە بەرژەوەندی حزبە گەورەكانە.

سەبارەت بە ئەگەری گۆڕانكارییەكان بەتایبەت لە بواری خزمەتگوزاری لە دوای هەڵبژاردنەكان ناوبراو ڕوونیكردەوە، وەكو ئەوەی گۆڕانكاری دروست ببێت وەكو خزمەتگوزاری ئەوە پەیوەندی بەوەوە هەیە كە تاكو ناڕەزایەتی لە شەقامدا هەبێت و ئەوانەشی لە دەسەڵاتدابن بیر لەوە دەكەنەوە جۆرێك لە خزمەتگوزاری پێشكەش بكەن بۆ كپكردنی ناڕەزایەتییەكان، بۆیە پەیوەندی نییە بەشێوەی هەڵبژاردنەكانەوە.

ڕێشاوی ڕاشیگەیاند، نەخشەی هەڵبژاردنەكە ڕوون نییە و گۆڕانكاری زۆر هەیە لە ژێرەوە، لەوانەیە حزبی كوردی و شیعی دەستیان تێكەڵكردبێت كە دەنگەكانیان بۆ یەك بچێت یان لە پەڕلەمان هاوكای یەكتر بن، بۆیە حزبەكان توانیویانە لەگەڵ ئەم میكانیزمە نوێیانەش خۆیان بگونجێنن، لەبەرئەوە چارەسەری عێراق تەنها هەڵبژاردن نییە، بەڵكو چارەسەرەكە ئەوەیە كە پەڕلەمان بتوانێت لێپرسینەوەی توند بكات، چونكە پەڕلەمان لە ساڵانی ڕابردوو بەشێك بووە لە گەندەڵی، بەشێوەیەك جەمسەرێكی گەورەی گەندەڵییە لە عێراق، نەك لێپرسینەوە لە گەندەڵی ناكات بەڵكو خۆی هۆكارە بۆ گەندەڵی.

ئاماژەی بەوەشكرد، لیژنەی نەزاهە كە باس دەكرێت خۆی بەشێكە لە گەندەڵی بەشێوەیەك وەزیرەكان بەرتیل دەدەن بە پەڕلەمانتار و لێپرسینەوەیان لەگەڵ ناكەن، هەربۆیە وڵاتێكی دەوڵەمەندی عێراق، بە نەوت، خەڵكەكەی لە ئاستێكی خراپی بژێویدان و بەهای دراوەكە بە ئەنقەست دابەزێنراوە و كێشەی ئابووری لە زیادبووندایە، ئەوەش لەبەر ئەو گەندەڵیەی كە دووبارە هەڵبژاردن دەكەنەوە.
باسی لەوەشكرد هەڵبژاردن لە عێراق دووبارە شەرعیەتدانەوەیە بەو حزبانەی كە دەسەڵاتیان بەدەستە، بۆئەوەی نەڵێن شەرعیەتت لە كوێ بوو هەڵبژاردن دەكاتەوە و شەرعیەت بەدەست دەهێنێتەوە و هیچ شتێكیتری تێدا نییە.