سەردێر

پەڕلەمانی كوردستان 4 وەزیر بانگهێشت دەكات

خەڵك-ئارام سەردار
سەرۆكی لیژنەی دارایی لەپەڕلەمانی ڕایدەگەیەنێت، دوای خوێندنەوەی ڕاپۆرتی دووەمی لیژنەی باڵای چاكسازی بەپێویستی دەزانین چوار وەزیر لەحكومەتی هەرێم بانگهێشتی لیژنە بكەین.

زیاد جەبار، سەرۆكی لیژنەی دارایی لەپەڕلەمانی كوردستان لەكۆنفڕانسێكی ڕۆژنامەوانیدا ڕایگەیاند، لە ڕابردوو كاتێك لەگەڵ ئەنجوومەنی وەزیران كۆبووینەوە ڕێككەوتین سێ مانگ جارێك لیژنەی باڵای چاكسازی ڕاپۆرتێك لەبارەی هەنگاوەكانی جێبەجێ كردنی یاساكە بداتە پەڕلەمان، وەكو لیژنەی دارایش ئەمڕۆ لەسەر دووەمین ڕاپۆرتی لیژنەكە كۆبووینەوە،هەرچەندە دەبوایە مانگی داهاتوو ڕاپۆرتی سێیەم بهاتایە.

دەشڵێت، “دوای خوێندنەوەی ڕاپۆرتەكە بەپێویستی دەزانین چوار وەزیر لەحكومەتی هەرێم بانگهێشتی لیژنە بكەین، تاوەكو ڕوونكردنەوەمان پێبدەن لەسەر ئەو تێبینیانەی هەمانە لەسەر جێبەجێكردنی یاساكە، ئەوانیش وەزیری دارایی و كاروباری شەهیدان و ناوخۆ، هەروەها وەزیری پێشمەرگە و سەرۆكی لیژنەی باڵای چاكسازی”.

ئەوەشی خستەڕوو، ڕەنگە ڕاپۆرتی سێیەم وردەكاری و ڕوونكردنەوەی زیاتری تێدابێت لەسەر ئەوەی لەجێبەجێ كردنی یاساكە چی گەڕاوەتەوە بۆ حكومەت، هەموو وەزارەتەكانیش دەستیان بەجێبەجێ كردنی یاساكە كردوە.