سەردێر

توركیا ئاوی فورات دەگرێتەوە

خەڵك-

ئەندامی دەستەی سەرۆكایەتی پارتی یەكێتی دیموكراتیك ڕایدەگەیەنێت، بۆ ماوەی سێ مانگە دەوڵەتی توركیا ئاوی بەسەر دانیشتووانی باكور و ڕۆژهەڵاتی سوریادا بڕیوە و مۆڵەت بە داخڵبوونی بەشەئاوی سوریا بە ڕووباری فورات نادات.

ئەم هەڵمەتەی توركیا جیا لە هەڕەشەی مرۆی بووەتە هۆی هەڕەشە لەسەر ژینگە بەتایبەت كە وەرزی هاوین نزیكە.

بێریڤان حەسەن ئەندامی دەستەی سەرۆكایەتی پارتی یەكێتی دیموكراتیك و هاوسەرۆكی ئەو حزبە لە ناوچەی فورات لە لێدوانێكی ڕۆژنامەوانیدا ڕایگەیاند، هاتنەخواری ئاستی ئاوی فورات بووەتەهۆی ئەوەی بەرهەمهێنانی كارەبا تووشی كێشە ببێت و ڕێژەی بەرهەمهێنانی كارەبا تا ئاستێكی بەرچاو دابەزێت.

وتیشی”بەپێی ڕێككەوتنی نێوان توركیا و سوریا دەبێت توركیا مۆڵەت بدات 500 مەتری سێجا لە چركەیەدا ئاو بگاتە سوریا، بەڵام ئەم ڕێژەیە ئێستا زۆر كەمتر بووەتەوە و بە ئاوڕدانەوە لە دۆخی نالەبارەی ئابوری خەڵكی سوریا ژیانیان دژوار بووەتەوە”.

ئاشكراشیكرد، بۆ ماوەی سێ مانگە توركیا ئاوی فوراتی داخستووە و لە ئێستادا بەرهەم هێنانی كارەبا گەیشتووەتە كەمتر لە 6 كاتژمێر لە ڕۆژێكدا و تاریكی ناوچەكەی داپۆشیوە.

ڕوونیشیكردەوە، وەكو پەیەدە داوا لە هەموو ناوەندە مافخوازییە نێودەوڵەتییەكان دەكەین دەستوەردان لەم بابەتەدا بكەن و مۆڵەت نەدەن توركیا ئاو بەسەر گەلەكەماندا ببڕێت، چونكە ئەمە هەنگاوێكی نایاساییە و دژی هەموو كۆنڤانسیۆنەكانی نێودەوڵەتییە و پێچەوانەی ڕێككەوتنی نێوان حكومەتەكانی توركیا و سوریایە.

جەختی لەوەش كردەوە، ئەگەر لەنێوان ئەم دوو وڵاتەدا شەڕیش بووبێت هیچ حكومەتێك بۆی نییە یاساكانی مافی مرۆڤ پێشێل بكات و ئاو بەسەر خەڵكدا ببڕێت. پێویستە لەباری مافناسییەوە ئاوڕ لە ڕێككەوتنی نێوان توركیا، سوریا و عێراق لەبارەی بەشە ئاوەوە بدرێتەوە و حكومەتی توركیا پابەندی ڕێككەوتنەكان بكرێت.