سەردێر

قەدەغەی هاتووچۆ بازاڕی بەرە جەژنان سستدەكات

چاودێری بازرگانی: قەدەغەی هاتووچۆ كاریگەری لەسەر جوڵەی بازاڕدەكات بۆ جەژن

خەڵك
بەڕێوەبەری چاودێری بازرگانی سلێمانی دەڵێت، قەدەغەی هاتووچۆ كاریگەری زۆری لەسەر جووڵەی بازاڕ دەبێت و بەشێك لە هاووڵاتیان پێداویستییەكان ناكڕن و داواش لە هاووڵاتیان دەكات چكلێتی هەڵڕژاو نەكڕن.

سۆران عەبدولغەفور، بەڕێوەبەری چاودێری و بازرگانی سلێمانی بە (خەڵك)ی ڕاگەیاند، بۆ ڕۆژانی ئاسایی لیژنەكانمان سەردانی شوێنەكان دەكەن و هەر شوێنێك سەرپێچی بكات لە ڕووی نرخەوە یان كاڵاو شمەكی خراپ و بەسەرچوو بفرۆشێت سزادەدرێت و بۆ ڕۆژانی جەژنی ڕەمەزانیش بەهەمان شێوەیە.

دەشڵێت: لە مانگی ڕەمەزاندا بەهۆی ئەوەی بەشێكی زۆری هاووڵاتیان لە شەواندا دووكان دەكەنەوە یان سەردانی بازاڕەكان دەكەن بۆیە لیژنەكانیش بە شەوان دەگەڕێن بۆ چاودێری نرخی بازاڕەكان بە تایبەت ئەو بابەتانەی پێداویستی جەژنە و هاووڵاتیان پێویستیانە لەڕووی نرخ و كوالێتی.

“بڕیاری قەدەغەی هاتووچۆ كاریگەری هەیە”

سۆران عەبدولغەفور ئاماژەی بەوەشكرد، بڕیاری قەدەغەی هاتووچۆ بۆ ڕۆژانی جەژن، كاریگەری زۆری هەیە لەسەر جموجۆڵی بازاڕ و وادەكات هاووڵاتیان پێداویستییەكانی جەژن نەكڕن.

“چكلێتی هەڵڕژاو مەكڕن”

سۆران عەبدولغەفور دەڵێت: داوا لە هاووڵاتیان دەكەین بە هیچ شێوەیەك چكلێت و نقوڵی هەڵڕژاوی سەر عەرەبانەو دووكانەكان نەكڕن و ئەوانە بكڕن كە بەرواری دروستكردن و بەسەرچوونیان پێوەیە، چونكە هەندێك كەس ئەو چكلێتانە دەفرۆشن كە بەروارەكەی بەسەرچووەو لە چەند ڕۆژی ڕابردووشدا دەستمان گرت بەسەر بڕێكی زۆری چكلێتی ماوەبەسەرچوودا.

“هاوردەكراوەكان پشكنینیان بۆ دەكرێت”

بەڕێوەبەری چاودێری بازرگانی سلێمانی ئاشكرایكرد، سەرجەم ئەو خواردنانەی دێنە هەرێمی كوردستان پشكنینی وردیان بۆ دەكرێت هەر بابەتێك مەرجی تەندروستی تێدا نەبێت ڕێگە نادرێت داغڵی هەرێم بكرێت.

راشیگەیاند كۆگاكان پڕن لە خۆراك و پێداویستی و هاووڵاتیان دڵنیا دەكەینەوە هیچ گرفتێك نییە .