سەردێر

پارێزگایەكی هەرێم بۆ قەدەغەی هاتووچۆ لە جەژن بڕیاریدا

خەڵك-
دوابەدوای بڕیاری لیژنەی باڵای ڕووبەڕووبوونەوەی كۆرۆنا لە هەرێم بۆ سەپاندنی قەدەغەی هاتووچۆ لە ڕۆژانی جەژندا، پارێزگاری دهۆك دەڵێت: “نابێت هیچ كەسێك لە ماڵ بێتەدەر”.

ڕۆژی هەینی، وەزارەتی ناوخۆی هەرێم بەیاننامەیەكی دەركرد و تێیدا بڕیارەكانی لیژنەی باڵای ڕووبەڕووبوونەوەی كۆرۆنای بڵاوكردەوە، كە بەپێی بڕیارەكە “لە كاتژمێر 12ی كۆتا شەوی مانگی ڕەمەزانەوە تاوەكو كاتژمێر 2ی كۆتا شەوی جەژن قەدەغەی هاتووچۆ لە سەرتاسەری هەرێم پەیڕەو دەكرێت”.

لای خۆیەوە، عەلی تەتەر، پارێزگاری دهۆك لە كۆنگرەیەكی ڕۆژنامەوانیدا ئاماژەی بەوەكردووە، قەدەغەی هاتووچۆ لە ڕۆژانی جەژنی ڕەمەزاندا هەموو شوێنە گشتییەكان و ئۆتۆمبێل و پیادەڕەویش دەگرێتەوە و نابێت هیچ كەسێك لە ماڵی خۆی بێتەدەرەوە.

هەرچەندە لە سەر ئاستتی ڕای گشتی هاووڵاتیان جۆرێك لە نیگەرانی و ناڕەزایی هەیە سەبارەت بە قەدەغەی هاتووچۆ لە ڕۆژانی جەژندا لەكاتێكدا لە كاتەكانی دیكەدا هەموو شوێن و بازاڕ و فەمرانگەكان قەرەباڵغن، بەڵام بڕیاری لیژنەی باڵای ڕووبەڕووبوونەوەی كۆرۆنا بەهۆی زیادبوونی ئامارەكانی تووشبوون و مردنە بە كۆرۆنا، ماوەی نزیكەی مانگێكە بەردەوام لە هەڵكشانە.