سەردێر

حزبە ئیسلامییەكان لە ناسكترین كاتدا پشتی یەكیان نەگرت

حزبە ئیسلامییەكان هێندەی لەگەڵ عەلمانییەكان دەسازێن لەگەڵ یەكدیدا ناسازێن

خەڵك-
هەڵبژادنی ئەمجارە ناسكترینە بۆ حزبەكان بەتایبەت حزبە بچوكەكان بەهۆی فرەبازنەییەوە پێویستیان بە هاوپەیمانی هەیە، بەڵام وادەی تۆماركردنی هاوپەیمانی تەواو بوو، حزبە ئیسلامییەكان نەیانتوانی بگەنە رێككەوتن.

پارتی دیموكراتی كوردستان بڕیاری دا سەربەخۆ بەشداری هەڵبژاردنەكان بكات و یەكێتی و گۆڕانیش هاوپەیمانێتییان پێكهێنا، حزبە ئیسلامییەكانیش بە تەنها و پەرش و بڵاو مانەوە.

هەندێك زانیاری رۆژنامەوانی باسی ئەوە دەكەن، كە كۆمەڵی دادگەری و یەكگرتووی ئیسلامی لەگەڵ پارتی و یەكێتی رێككەوتوون لەسەر شێوازی دیاریكردنی كاندیدەكان.
یەكگرتووی ئیسلامی، كۆمەڵی دادگەری و بزووتنەوەی ئیسلامی نەیانتوانی بگەنە رێككەوتن نە لەنێو خۆیاندا و نە لە لەگەڵ لایەنەكانی دیكەی ئۆپۆزسیۆنیش، بۆیە كۆمەڵ و یەكگرتوو كاندیدەكانیان بەسەر بەخۆ بەشداری دەكەن لە هەڵبژاردندا، بزووتنەوەی ئیسلامیش خۆی ساغ نەكردووەتەوە بە تەمایە چ بكات.

چاودێرێكی سیاسی ڕایدەگەیەنێت، بەهۆی نابەرپرسیارێتی بەشێك لە سەركردە ئیسلامییەكان و بەرژەوەندی تایبەت بە خۆیان هاوپەیمانی ئیسلامییەكان لەدایك نابێت.

عەبدوڵڵا ڕێشاوی چاودێری سیاسی بە (خەڵك)ی ڕاگەیاند، بەرژەوەندیی هەندێك حزب و كەسایەتی ناو حزبە ئیسلامییەكان لەگەڵ حزبی نائیسلامی هەیە، بۆیە هاوپەیمانی نێوان ئیسلامییەكان بەهیچ شێوەیەك سەركەوتوو نەبووە، لەم هەڵبژاردنەشدا نەیانتوانی ئەو هاوپەیمانییەتییە پێكبهێنن.

وتیشی”لەكاتێكدا وتاری ئیسلامییەكان پڕە لە بابەتی برایەتی و هاوكاریكردنی یەكتر، بەڵام ئەگەر ئەمە ڕاستبوایە و وایلێدەكردن بچنە پاڵ یەك و لە هەڵبژاردنەكاندا لیستێكی هاوپەیمانی بەهێز دروست بكەن، كە دەبووە جێی ئومێدی زۆرێك لە دەنگدەران، بەڵام دەركەوتووە نەبوونی ئەم هاوپەیمانیەتییە زیانێكی زۆری بە ئیسلامییەكان گەیاندووە”.

ئاشكراشیكرد، ئیستا ئیسلامییەكان لەبەردەم چارەنووسێكی مەترسیداردان و لەوانەیە كورسییەكانیان لە پەڕلەمانی عێراق لەدەست بدەن، پێشبینی دەكرێت هەندێك لە حزبەكان كورسی نەهێنن، بۆیە ئەمە پاشەكشێیەكی گەورەیە لە كوردستان و هۆكارەكەشی بۆ نابەرپرسیارێتی خەڵكانێكی زۆر دەگەڕێتەوە لە سەركردایەتی ئیسلامییەكان كە نەیانتوانی لە هەڵبژاردنەكان بچنە پاڵ یەك و خەونی جەماوەری ئیسلامی بەدیبهێنن، بەڵكو هەركام بەدوای بەرژەوەندی خۆیدا دەگەڕێن.

ڕوونیشیكردەوە، ئیسلامییەكان پێیانوایە ئەگەر بتوانن لە یەكتری بەرنەوە كێبڕكێی یەكتر بكەن دەیبەنەوە، بەشێوەیەك هێندەی كێبڕكێی یەكتر دەكەن كێبڕكێی حزبەكانیتر ناكەن، بۆیە دەبینین ناچنە پاڵ یەك، ئەمیان دەیەوێت كورسییەك لەو زیاتر بهێنێت و دەڵێت ئەوە خەونەكەیە، بەرپرسیارێتیان لە ئاستێكی بەرزدا نییە.

ئەمە یەكەمجار نییە حزبە ئیسلامییەكان ناگانەیەك، پێشتریش دوای هەوڵ و كۆبونەوەی زۆر نەیانتوانی بەرەیەكی ئیسلامی لە كوردستان پێكبهێنن.