سەردێر

ئارام جەمال: بۆچی ژمارەی كاندیدەكانی ئەم هەڵبژاردنە كەم دەكات؟!

خەڵك

بەڕێوەبەری پەیمانگەی كوردی بۆ هەڵبژاردن ڕایدەگەیەنێت: ژمارەی كاندیدەكانی ئەم هەڵبژادنە كەم دەكات.

ئارام جەمال، بەڕێوەبەری پەیمانگەی كوردی بۆ هەڵبژاردن لە هەژماری تایبەتی خۆی لە تۆڕی كۆمەڵایەتی فەیسبوك نووسیویەتی: ئەگەر بەراوردی ژمارەی كاندیدانی دواترین دوو هەڵبژاردنی ئەنجومەنی نوێنەرانی عێراق بكەین لەگەڵ ژمارەی ئەو كاندیدانەی خۆیان بۆ هەڵبژاردنی داهاتووی (١٠-١٠-٢٠٢١) پاڵاوتووە، دەبینین ژمارەكە بە رێژەیەكی بەرچاو كەمدەكات.

دەقی نووسینەكەی بەڕێوەبەری پەیمانگەی كوردی بۆ هەڵبژاردن:

بۆچی ژمارەی كاندیدەكانی ئەم هەڵبژاردنە كەم دەكات؟!

ئەگەر بەراوردی ژمارەی كاندیدانی دواترین دوو هەڵبژاردنی ئەنجومەنی نوێنەرانی عێراق بكەین لەگەڵ ژمارەی ئەو كاندیدانەی خۆیان بۆ هەڵبژاردنی داهاتووی (١٠-١٠-٢٠٢١) پاڵاوتووە، دەبینین ژمارەكە بە رێژەیەكی بەرچاو كەمدەكات، بۆچی؟!

لە كورترین وەڵامدا دەڵێین لەبەرئەوەی سیستمی هەڵبژاردنەكە لە (لیستی نوێنەرایەتی رێژەیی PRL)ەوە گۆڕاوە بۆ (زۆرینەی یەكدەنگی نەگوێزراوە SNTV) ، كە دیارە لێرەشەوە سێ رەگەزە پێكهێنەرەكەی سیستمی هەڵبژاردنەكە گۆڕینی بەسەردا دێت:

١/ خۆكاندیدكردن لە لیستەوە گۆڕاوە بۆ كاندیدی تاكەكەسی سەربەخۆ یان كاندیدی حزبی/ هاوپەیمانێتی. واتە بە پێچەوانەی لیستەوە كە تا چەند ژمارەی كاندیدەكانی ناو لیستەكە زیادبكرایە بۆیان باشتر بوو چونكە دەنگەكانی ناو لیستەكە هەمووی كۆدەكرایەوەو دواتر دەنگەكان دەگوێزرانەوە لە كاندیدی كەم دەنگەوە بۆ كاندیدی زۆردەنگ، بەڵام لە سیستمی هەڵبژاردنی ئێستادا دەنگی هەر كاندیدێك تەنهاو تەنها بۆ خۆیەتی و ناگوێزرێتەوە بۆ هیچ كاندیدێكی دیكە..

٢/ زیادبوونی ژمارەی بازنەكانی هەڵبژاردنەكان لە (١٨) بازنە ( پارێزگا)وە بۆ (٨٣) بازنەی هەڵبژاردنی بچووكتر لە پارێزگا، ئەمەش توانای حزبە بەشدارەكانی هەڵبژاردن لە رنە و قاڵب دەدات و دەتوانن تەنها لە ژمارەیەك بازنەی هەڵبژاردنی سنورداردا كاندیدیان هەبێت..

٣/ بچوكبونەوەی قەبارەی بازنەكان لە دەیان كورسی نوێنەرایەتییەوە بۆ (٣-٥) كورسی/نوێنەر، ئەمەش حزبە بەشدارەكانی هەڵبژاردن ناچاردەكات لەباشترین حاڵەتدا (٣) كاندیدیان لە بازنەیەكدا هەبێت.

كەواتە ئەم سێ رەگەزە (كاندیدی تاكەكەسی، زیادبوونی ژمارەی بازنەكانی هەڵبژاردن، بچوكبونەوەی قەبارەی بازنەكانی هەڵبژاردن) ئەو سێ هۆكارەن كە هەریەكەیان بە ئاستێك حزبەكان ناچاردەكات كەمترین كاندیدیان لە بازنەكاندا هەبێت و بەمەش كۆی ژمارەی كاندیدەكان لەسەر ئاستی هەژدە پارێزگاكە بەشێوەیەكی بەرچاو كەمدەكات..