سەردێر

لە ساڵێكدا 712 حاڵەتی پێشێلكاری بەرامبەر كرێكاران ئەنجامدراوە

خەڵك
لە ڕۆژی جیهانی كرێكاراندا ڕێكخراوی مافی مرۆڤی هەنگاو ڕاپۆرتێكی بڵاوكردەوە كە تێیدا ئاماری پێشێلكاری مافەكانی كرێكاران خراوەتەڕوو كە لە ماوەی ساڵێكدا 712 حاڵەت بووە.

ڕێكخراوی مافی مرۆڤی هەنگاو لە ڕاپۆرتێكدا بڵاویكردەوە، لە 1ی 5ی ٢٠٢٠ هەتا ١ی 5 ی ٢٠٢١ ،٧١٢ حاڵەتی پێشێلكاری مافەكانی كرێكاران لە كوردستان تۆمار كراوە.

لە ڕاپۆرتەكەی هەنگاودا ئاماژە بەوەكراوە، لەو ماوەیەدا٦٩ كرێكاری كورد لە كاتی كارد كردن و بە هۆی ڕووداوی كارەوە گیانیان لە دەست داوە كە تەمنی یەكێكیان ژێر ١٨ ساڵ بووە.

لە كۆی ئەو ٦٩ كرێكارە كە گیانیان لە دەست داوە ٣٣ كەسیان لە پارێزگای سنە، ١٩ كەسیان لە پارێزگای ئورمیە، ١٢ كەسیان لە پارێزگای كرماشان و ٥ كەسیان لە پارێزگای ئیلام بوون.

هەروەها، ٧ كرێكار لە شارەكانی هەرێمی كوردستان، ٧ كرێكار لە شارەكانی ناوەندی ئێران و ٥٥ كرێكاریش لە شارە جیاوازەكانی كوردستان بە هۆی ڕووداوی جۆراوجۆرەوە گیانیان لە دەست داوە.

٢٩ كرێكار بە هۆی بەربوونەوە لە بەرزایی، ١٢ كرێكار بە هۆی ڕووداوی هاتووچۆ، ١٠ كرێكار بە هۆی تەزووی كارەبا، ٩ كرێكار بە هۆی داڕمانی دیوار و ٣ كرێكاریش بە هۆی سووتانەوە گیانیان لە دەست داوە.

ئەوەش هاتووە، لە ساڵی ڕابردوودا ١٦ شوان، جووتیار و چێواری كورد لە سنوورەكانی كوردستان بە هۆی تەقینەوەی مینەوە بوونەتە قوربانی كە ٥ كەسیان گیانیان لە دەست داوە و ١١ كەسیان بریندار بوون .

هەروەها،67 كۆڵبەریش لە سنوورەكانی كوردستان كوژراون، كە
٤٦ كەسیان بە تەقەی هێزە چەكدارەكانی ئێران و توركیا، ١٦ كەسیان بە هۆی ڕووداوی سرووشتی، ٣ كەسیان بە هۆی ڕووداوی هاتووچۆ و ٢ كەسیان لە ئەنجامی لێدان و ئەشكەنجەی هێزە چەكدارەكانی توركیا كوژراون.

ئاماژە بەوەشكراوە، هەر لەو ماوەیەدا ١٨٨ كۆڵبەر و كاسبكاری كورد لە سنوورەكانی كوردستان بریندار كراون، لە كۆی ئەو كۆڵبەرانە ٧ كۆڵبەر تەمەنیان ژێر ١٨ ساڵ بووە كە ٤ كەسیان گیانیان لە دەست داوە و ٣ كەسیان بریندار بوون.

لە ڕاپۆرتەكەی هەنگاودا ئەوەش هاتووە، لە ماوەی ئەو ساڵەدا ٧ چالاكی كرێكاری كورد و ١١ كۆڵبەر و كاسبكار لەلایەن هێزە ئەمنییەكانی كۆماری ئیسلامی ئێرانەوە دەستبە سەر كراون.