سەردێر

كۆچی گەنجان دەڤەرێكی هەرێم بەرەو پیربوون دەبات

لەسەرەتای بەهارەوە تا ئێستا 300 گەنج لە دەڤەری پشدەر و قەڵادزێ‌ بەرەو وڵاتانی دەرەوە كۆچيان كردووە

خەڵك
لەسەرەتای بەهارەوە تا ئێستا 300 گەنج لە دەڤەری پشدەر و قەڵادزێ‌ بەرەو وڵاتانی دەرەوە كۆچيان كردووە و قائیمقامی قەزای پشدەریش دەڵێت ناوچەكە دەبێت بە مەملەكەتی پیران.

بەكر بایز، قائیمقامی قەزای پشدەر بە (خەڵك) ی ڕاگەیاند، ئەگەر بەو ئاستەیەی ئێستا بەردەوام بێت ئەو دەڤەری ئێمە پشدەر و قەڵادزێ‌ دەبێت بە مەملەكەتی پیر و بەساڵاچوان، چونكە ژمارەیەكی زۆر ی گەنجان كۆچ دەكەن بۆ وڵاتانی دەرەوە.

“لەسەرەتای بەهارەوە تا ئێستا 300 گەنج كۆچیان كردووە”

بەكر بایز وتیشی، لە سەرەتای بەهارەوە تا ئێستا 300 گەنج لە دەڤەری پشدەر و قەڵادزێ‌ كۆچیان كردووە، كە لە بەرامبەردا 300 كچ ناتوانێت هاوسەرگیری بكات كە ئەمە ئایندەی كۆمەڵگە والێدەكات توشی داڕمان ببێت و بێبەش ببێت لەو توانا و هێزەی گەنجان هەیانە بۆ پێشكەوتنی كۆمەڵگە.

وتیشی، گەنج داینەمۆی بەرەو پێشچوونی هەر وڵاتێكە و لەڕێی ئەوانەوە بەرنامەی پێشخستنی كۆمەڵگە دادەنرێت ، بەڵام بەهۆی ئەوەی گەنجانی ئێمە كۆچ دەكەن ، كارەساتی گەورە دروست دەبێت.

“حكومەت ناوچەكەی پشتگوێ‌ خستووە”

دەشڵێت، هۆكارەكە ئەوەیە حكومەت ئەو ناوچانەی پشتگوێ‌ خستووەو كەرتی تایبەتیش سستە بۆ ئەوەی دەرفەتی كار بە گەنجان بدات و خەڵكی ناوچەكە بەگشتی پشت بە مووچە دەبەستن كە هەموان دەزانن لە ئێستادا بار و دۆخی مووچە چۆنە.

ئاماژەی بەوەشكرد، ئەگەر حكومەتی هەرێمی كوردستان بێتە سەر هێڵ و ئەو پڕۆژانە جێبەجێ‌ بكات كە گەنجان لێی سودمەند دەبن و دەرفەتی كار بڕەخسێنێت خەڵك بۆ كۆچ دەكات؟

 



هەلبژاردە

گرنگترینەکان