سەردێر

هەوڵی هەمواركردنەوەی یاسای كار دەدرێت و كرێكارانیش 6 داواكارییان هەیە

سلێمانی – نزار جەزا
ئەمڕۆ یەكی ئایار ڕۆژی جیهانی كرێكاران لەشاری سلێمانی بەرز ڕاگیرا و ژمارەیەك كرێكار لەو ڕۆژەدا ڕێزیان لێنرا، هاوكات سەندیكای كرێكارانیش شەش داواكاری خستەڕوو.

لەپاركی كرێكاران لەشاری سلێمانی ڕێوڕەسمێكی فراوان بەڕێوەچوو، كە لەدەستپێكدا داواكاری كرێكاران لەلایەن چالاك ڕەئوف، سەرۆكی لقی سلێمانی سەندیكای كرێكارانی كوردستان خرایەڕوو، كە بریتیبوو لەم خاڵانە:

یەكەم: هێنانی كرێكاری بیانی لەلایەن خاوەنكار و كۆمپانیاكانەوە سنوورداربكرێت.

دووەم: چاودێری ورد و زیاتری خاوەنكار و كۆمپانیاكان بكرێت بۆ دابینكردنی پێداویستییەكانی سەلامەتی پیشەیی.

سێیەم: لەكاتی پێدانی مۆڵەتی كاركردنی جۆراوجۆر بەكۆمپانیاكان، ئاگاداری سەندیكای پیشەیی بكرێتە مەرج، بەمەبەستی پابەندكردنی كرێكار و خاوەنكار بە گرێبەستی كار لەپێناو بەرژەوەندی گشتی.

چوارەم: چارەسەركردنی كێشەی كریكارانی گرێبەستی كاتی لەكەرتی گشتی و كەرتی تایبەت.

پێنجەم: بەگەڕخستن پارەی پاشەكەوتی كرێكاران لەپڕۆژەی وەبەرهێنان لەخزمەتی كرێكاراندا.

شەشەم: جێكردنەوەی نوێنەری سەندیكاكانی كرێكاران لەئەنجومەنی شارەوانی گرنگی خۆی هەیە.

یاسای كار و یاسای خانەنشینی و دەستەبەری كۆمەڵایەتی پێویستیان بەهەمواركردنەوەیە، لەم ڕۆژەدا و لەساڵانی ڕابردووشدا كرێكاران و سەندیكاكان داوای هەمواركردنەوەی ئەم یاسایانە دەكەن، بۆئەوەی مافی كرێكار پارێزراوبێت.

No description available.

بەپێی ئامارەكانی سەندیكای كرێكارانی كوردستان، كە دەست (خەڵك) كەوتووە، لەماوەی ساڵی ٢٠٢٠دا ٣٥ كرێكار لەهەرێمی كوردستان گیانیان لەدەستداوە كە ١٧ كرێكاریان لەشاری سلێمانین، هاوكات لەماوەی چوار مانگی ساڵی ٢٠٢١دا ١٠ كرێكار گیانیان لەدەستداوە، كە حەوتیان لەشاری سلێمانین.

No description available.

هەڤاڵ ئەبوبەكر، پارێزگاری سلێمانی ڕایگەیاند، پێشنیاز دەكەن و پشتیوانی كۆبوونەوەیەكی فراوان لەبارەی یاسای كار و دەستەبەری كۆمەڵایەتی دەكەن، كە لەپاش جەژنی ڕەمەزان لەگەڵ سەندیكاكانی كرێكاران و كۆمپانیاكان و لایەنە پەیوەندیدارەكان كۆببنەوە، بەمەبەستی گفتوگۆكردن لەبارەی مافەكانی كرێكاران و هەر بڕیارێك پێویست بێت لەخزمەتی كرێكاران بیدەن.

ئاماژەی بەئەوەشدا، لێپرسینەوەی یاسایی لەگەڵ ئەو كۆمپانیایانە دەكەن، كە پابەندی ئەو گرێبەستە نابن كە واژۆیان كردووە.

ئاشكراشیكرد، لەگەڵ چەندین كۆمپانیای وەبەرهێن قسەیان كردووە، بۆئەوەی یەكەی نیشتەجێبوون بۆ كرێكاران دابین بكەن، بەپێی داهاتی خۆیان.

No description available.

ڕەوشی كرێكاران تادێت خراپتردەبێت، بەشێك لە خاوەنكارەكان وەك كۆیلەی مۆدێرن مامەڵە لەگەڵ كرێكار دەكەن، بەجۆرێك لەهەندێك شوێنكاردا كرێكار دەبێت هەشت كاتژمێر بەپێوە بوەستێت.

كرێكار بەو كەسە دەوترێت، كە كارێكی بەردەوامی نییە، نە خاوەن كارە، نە كارمەندە لەكەرتی گشتی.

زیاتر لەملیۆنێك كرێكار لەكەرتی تایبەت لەهەرێمی كوردستاندا كاردەكەن، كە بەناونیشانی جیاواز كاردەكەن و پێویستە لەژێر یاسایەكدا كاركردنیان ڕێكبخرێت، بۆئەوەی مافی تەواویان پێبدرێت و پێشێلی مافەكانیان نەكرێت.

No description available.